«Almaty-Astana» trassasynda birde-bir jol belgisi standartqa saı emes
ALMATY. QazAqparat - Almaty - jol apattary men ondaǵy adam ólimderi boıynsha elimizde aldyńǵy orynda tur. Bul týraly búgin Halyqaralyq jol apaty qurbandaryn eske alý kúnine oraı uıymdastyrylǵan baspasóz máslıhatynda aıtyldy, dep habarlaıdy QazAqparat tilshisi.
Jol polıtsııasynyń málimetinshe, jyl basynan beri Almatyda 3,5 myń jol apaty bolǵan. 114 adam qaıtys bolsa, 4 myń adam jaraqat alǵan.
«Ólim kórsetkishi ótken jylmen salystyrǵanda 8 adamǵa kóp. Jalpy, 2011 jyldan beri tirkelgen jol apattarynyń sany 50-100-ge azaıyp keledi. Adam ólimi tómendeý úrdisin kórsetip kele jatty. Biraq bıyl olardyń sany 8 adamǵa kóp. Munyń negizgi sebebi, qaza bolǵan 114 adamnyń 69-yn jaıaý júrginshiler jolynda qaǵyp ketken. 20 jaǵdaıda júrgizýshiler kólik rýline ıe bola almaı, qorshaýǵa, baǵanǵa soǵylǵan. Onda jolaýshylar zardap shekken»,- dedi qalalyq Polıtsııa departamenti ákimshilik polıtsııa basqarmasynyń basshysy Jandos Muratalıev.
Onyń aıtýynsha, qalada jol apattarynyń sanyn azaıtý maqsatynda jerasty jáne jerústi joldary salynǵan. Jol belgileri qoıylyp, avtobýstarǵa bólek jolaq berildi.
«Biz jolda burynǵydaı kóp turmaımyz. Quqyqbuzýshylyqtardy anyqtaıtyn jańa tásilder qarastyryp jatyrmyz. Almatyda 104 foto-vıdeo post qoıylǵan. Sonymen qatar «Jol Aq» vıdeo-tirkegishi, «Sergek» vıdeo-júıesi, «Qaýipsiz jol qozǵalysy» aqparattyq júıesi boıynsha qosymsha 142 kamera ornatylady», - dedi ol.
Dúnıejúzilik densaýlyq saqtaý uıymynyń málimetterine sáıkes, Qazaqstan jol-kólik apattarynyń aýyr saldary boıynsha álemde aldyńǵy orynda tur. Qazaqstanda alǵashqy alty aıda 6743 jol apaty bolyp, olarda 783 adam kóz jumdy, 9,4 myńy jaraqat aldy. Osy kezeńde eń kóp jol apaty Almaty (2477) men Almaty oblysynda (917) tirkelgen.
«Qazaqstanda jol apatynan kóz jumý yqtımaldylyǵy Norvegııa elimen salystyrǵanda 11 ese joǵary. Joldarymyzda jylyna 3 myń adamnyń ómiri qıylyp, 30 myń adam jaraqattanady. «Nól apattar» áleýmettik jobasy aıasynda biz Almaty-Astana tas jolyn avtokólikpen júrip óttik. Ókinishke oraı, eldegi respýblıkalyq mańyzy bar negizgi trassa eń qaýipti bolyp shyqty. Bul joldarda nege adam óledi? Kóbinese júrgizýshiler qarsy betke shyqpaq bolǵanda soǵylady. Joldaǵy birde-bir belgi jaryqqa shaǵylysý jáne kólemi boıynsha GOST standarttaryna saı bolmaı shyqty. Júrgizýshi joldaǵy kedergini aldyn ala kórip otyrýy tıis. Avtomobıl - álemdegi eń qaýipti kólik túri. Tipti ushaq apattarynan qaza bolatyndar sany myńnan aspaıdy. Memleket barlyǵyn baqylaı almaıdy. Sondyqtan, joldaǵy ahýalǵa yqpal etý úshin bıznes pen belsendiler qosyldy», - dedi «Ortaq jol» jol qozǵalysy qaýipsizdigi qaýymdastyǵynyń bas hatshysy Alekseı Alekseev.
Aıta ketý kerek, baspasóz máslıhatyna Ekaterına Parafıeva qatysty. Kelinshek 2017 jyly ál-Farabı dańǵylynda jol apatyna túsip, qos aıaǵynan aıyrylǵan bolatyn.
«Jol qaýipsizdiginiń joqtyǵyn óz basymdaǵy jaǵdaıdan bilemin. Dóńgelekti qaraý úshin syrtqa shyǵyp, apattyq belgini qoıam degenshe 30 sekýnd ishinde meni qaǵyp ketti. Bul ne sebepten boldy? Telefonmen sóılesý me, jyldamdyqty asyrý ma? Ony aıta almaımyn. Men endi qazir jol qaýipsizdigin saqtaýdyń mańyzdylyǵyn aıtqym keledi», - dedi E. Parafıeva. 
Mamandardyń aıtýynsha, jylyna álemde 1,21 adam jola apatynan kóz jumady.
