Almaty-Astana poıyzynda tártip buzǵan jolaýshylar fýtbolshy emes - QFF
ASTANA. QazAqparat - Qazaqstannyń fýtbol federatsııasy Almaty-Astana poıyzynda bolǵan oqıǵaǵa qatysty túsinik berdi, dep habarlaıdy QazAqparat.
Esterińizde bolsa, 4 qazan kúni áleýmetitk jelide jáne buqaralyq aqparat quraldarynda Almaty-Astana poıyzynda qoǵamdyq tártipti buzǵan jas jigitterdiń vıdeosy tarap ketken bolatyn. Jastar kýpedegi qural-saımandar men ishki jabdyqtardy zaqymdaǵan. Jolda spırttik ishimdik iship, jolseriktiń eskertýine qulaq aspaǵan. El arasynda «bular fýtbolshylar» degen de pikir taraǵan bolatyn. Osyǵan qatysty Qazaqstan fýtbol federatsııasy málimdeme jasady.
«Qazaqstan fýtbol federatsııasy resmı túrde habarlaıdy - bul azamattar belgili bir fýtbol klýbynyń jankúıerleri. Olar jeke sharýalarymen Qaraǵandy qalasyna bara jatqan. Olar kásibı fýtbolshy emes», - delingen federatsııanyń resmı saıtynda.
Aıta keteıik, atalǵan azamattardyń bireýine qatysty ákimshilik is qozǵalyp, oǵan 5 AEK, ıaǵnı 12 025 teńge kóleminde aıyppul salynǵan.
