«Almaty-Astana» poıyzynda tártip buzǵan jolaýshy jazalandy
QARAǴANDY. QazAqparat - «Almaty - Astana» baǵytyndaǵy poıyzdyń kýpesinde tártipsizdik jasaǵan jolaýshylardyń birin jelilik polıtsııa qyzmetkerleri Qaraǵandy- Sortırovochnyı stansasynda alyp qaldy, dep habarlaıdy QazAqparat tilshisi.
«Jolaýshylar tasymaly» AQ baspasóz qyzmeti málim etkendeı, 4 qazanda № 701 «Almaty- Astana» poıyzynyń № 20 vagony 5-kýpesindegi jolaýshylar qoǵamdyq tártipti buzǵan. Jastar jolda spırttik ishimdik iship, jolseriktiń eskertýine qulaq aspaǵan.
«Kýpedegi qural-saımandar men ishki jabdyqtardy zaqymdaǵan tóbeleskishterdi Іshki ister jelilik bóliminiń qyzmetkerleri ustady. Olardyń kompanııaǵa keltirgen zalaly anyqtalyp jatyr», - dep atap ótti kompanııanyń baspasóz qyzmeti Instagram-daǵy vıdeorolıkke pikir bildire otyryp.
Kóliktegi polıtsııa departamenti baspasóz qyzmetiniń málimetinshe, 5 qazanda Qaraǵandy-Jolaýshylar stansasynda «Almaty-Astana» baǵytyndaǵy jolaýshylar poıyzy basshysynyń akti boıynsha polıtsııa qyzmetkerleri atalmysh poıyzdyń 32 jastaǵy jolaýshysyn Qaraǵandy- Sortırovochnyı stansasynda túsirip alyp qalǵan.
Tekserý barysynda azamattyń Ákimshilik kodekstiń 440-baby 1-bóligi (Qoǵamdyq oryndarda alkogoldik ishimdik ishý nemese mas kúıde bolý») boıynsha ákimshilik quqyq buzǵany anyqtaldy.
Ákimshilik is qozǵalyp, oǵan 5 AEK kóleminde, ıaǵnı 12 025 teńge kóleminde aıyppul salyndy.
