«Almaty-Astana» baǵytyndaǵy ushaq bortynda temeki shekken adam jazalandy
ASTANA. QazAqparat - Astana qalasynyń áýejaıyndaǵy Jelilik polıtsııa bólimine «Eır Astana» AQ-nyń qaýipsizdik qyzmetinen «Almaty-Astana» baǵytyndaǵy ushaq bortynda quqyqbuzýshy bar ekendigi týraly aqparat kelip túsken, dep habarlady Kóliktegi ІІD-niń baspasóz qyzmetinen.
Tekserý barysynda jolaýshy er azamattyń áýe kemesiniń bortynda temeki shekkeni týraly derek anyqtaldy. Kólik polıtseıleri QR ÁQBtK-tiń 441-baby 1-tarmaǵy (Jekelegen qoǵamdyq oryndarda temeki tartýǵa salyǵan tıymdy buzý) boıynsha ákimshilik hattama toltyrdy. Jyl basynan beri Kóliktegi ІІD qyzmetkerleri belgilenbegen jerlerde temeki tartýǵa salynǵan tıymdy buzǵany úshin 3600-den astam adamdy jaýapkershilikke tartqan, sonyń ishinde Astana qalasyndaǵy áýejaıdyń JPB qyzmetkerleri 250 quqyqbuzýshyny, Almaty qalasyndaǵy áýejaıdyń JPB qyzmetkerleri 32 quqyqbuzýshyny ustaǵan.
