Almaty-Astana baǵytyndaǵy poıyz basshysy ákimshilik jaýapkershilikke tartyldy
ASTANA. 25 shilde. QazAqparat - QR Kólik jáne kommýnıkatsııa mınıstrligi Kóliktik baqylaý komıtetiniń qyzmetkerleri №3/4 Almaty - Astana baǵytyndaǵy jolaýshylar poıyzyna Shý-Saryshaǵan ýchaskesinde jospardan tys tekserý júrgizý barysynda kóliktik zańnamany buzyp,
jolaýshylar poıyzyna bıletsiz otyrǵan 30 jolaýshyny anyqtady. Atalǵan poıyz jeke tasymaldaýshy kompanııa «Turan Ekspress» JShS-ne tıesili. Buzýshylyqqa jol bergeni úshin poıyz basshysy ákimshilik jaýapkershilikke tartyldy. Bul týraly Kólik jáne kommýnıkatsııa mınıstrliginiń baspasóz qyzmetinen habarlandy.
Budan basqa, Temirjol kóliginde jolaýshylar men júkterdi tasymaldaý erejesiniń talaptaryn saqtamaǵany úshin jáne tasymaldaýshynyń Áleýmettik mańyzy bar oblysaralyq qatynastar boıynsha jolaýshylar tasymalyn júzege asyrýyn sýbsıdııalaý jónindegi kelisimshartty oryndamaǵy úshin «Turan Eskpress» ÓK» JShS-ne aıyppul salý máselesi qarastyrylady.
Kóliktik baqylaý komıtetinde atap ótkendeı, jolaýshylardy bıletsiz tasymaldaý Temirjol kóliginde jolaýshylar men júkterdi tasymaldaý erejesin buzýdyń negizgi faktory bolyp tabylady.
2013 jyldyń І jartyjyldyǵynda elimizdiń temir joldarynda 1028 jolaýshylar poıyzy tekserilip, 733 jolaýshynyń poıyzǵa bıletsiz otyrǵany anyqtaldy.
