Almaty aspanynda Qazaqstannyń eń úlken týy jelbiredi

ALMATY. QazAqparat - Kásibı parashıýtshi Oleg Toşev ushaqtan parashıýtpen sekirý kezinde kólemi 800 sharshy metr bolatyn Qazaqstannyń eń úlken týyn áýede ashty. Ol Qazaqstan rekordtar kitabyna endi, dep habarlaıdy QazAqparat tilshisi.

Respýblıka kúnine arnalǵan «Ashyq aspan» aktsııasy Іle Alataýy taýlary aıasynda, Almaty oblysynyń aýmaǵynda ótti.

«Týdyń kólemi - 800 sharshy metr. Bul tý Astananyń basty flagshtogynda (450 sharshy metr) ornatylǵan týdan eki ese úlken. Ol óte qysqa merzimde - eki apta ishinde osy biregeı oqıǵa úshin arnaıy jasaldy. Bul is-shara aspanda ashylǵan QR eń úlken týy retinde Qazaqstannyń rekordtar kitabyna enedi. Sekirýdiń bıiktigi 3000 metrdi quraıdy. Bul eń tanymal Shymbulaq taý shańǵysy kýrortynyń deńgeıinen joǵary», - dedi is-sharany uıymdastyrýshylardyń biri Tilek Kanalın.

Uıymdastyrýshylar aktsııanyń maqsaty qazaqstandyqtardyń patrıottyq rýhyn nyǵaıtý, sondaı-aq, etnosqa qaramastan bir-birine degen tolerantty qatynasty saqtaý ekenin aıtty.

«Tý - bárimizdi biriktiretin memlekettik rámiz, bul bizdiń Táýelsizdigimizdiń sımvoly. Biz óz týymyzǵa qurmetpen qaraýdy, memleketimizge degen patrıottyq sezimdi nyǵaıtýdy qalaımyz», - dep atap ótti Tilek Kanalın.

Oleg Toşev parashıýtpen sekirý boıynsha álemdik rekordshy. 12 jyl ishinde ol 5800 sekirý jasady. Oleg bul is-sharaǵa bir aı daıyndalǵan.

«Ushqysh ekeýmiz barlyq detaldi talqyladyq. Muqııat daıyndaldyq. Jalpy, týmen sekirý ıdeıasy jaqsy boldy. Mende osyǵan deıin ushaqtan úlken týmen sekirip kórgenmin», - dedi Oleg Toşev.

Qazaqstandyq rekordtar kitabynyń resmı ókili Qýandyq Qudaıbergenov týmen sekirý oryndalǵannan keıin uıymdastyrýshylarǵa rekordty rastaıtyn sertıfıkat tabys etti.

«Rekordtyń máni – parashıýtshi sportshylar3000 metr bıiktikte Qazaqstannyń eń úlken týyn jelbiretti. Onyń salmaǵy 90 kg - ǵa jýyq jáne qatty materıaldan jasalǵan. Dál osylaı bıikten ony tómen túsirý ońaı emes. Aktsııanyń ózi óte qaýipti, ony oryndaý da ońaı emes. Tipti, 100 metr bıiktikte aýa aǵyndary bolady, al tájirıbeli parashıýtshiler búgin 3000 metr bıiktikte jumys istedi», - dedi ol.

Almaty oblysy dene shynyqtyrý jáne sport basqarmasynyń basshysy Nurbaqyt Teńizbaev aktsııany uıymdastyrǵan Qııas Jomart, Ibragım Eskendir, Jumaǵalı Qurmanbek, Temir Spataev, Alan Darmenov, Toıbek Myrzabekov sııaqty bastamashyl topqa alǵys aıtyp, barsha qazaqstandyqtardy ulttyq merekemen quttyqtady.