Almaty Arena jáne Halyk Arena halyqty jappaı syrǵanaq tebýge shaqyrýda
ALMATY. QazAqparat - Almaty Arena jáne Halyk Arena muz saraıynda jappaı syrǵanaý maýsymy jalǵasýda, dep habarlaıdy «QazAqparat» HAA-nyń tilshisi Aqparattyq jáne sporttyq HAB-qa silteme jasap.
Almaty qalasynyń túrǵyndary men qonaqtaryna senbi jáne jeksenbi kúnderi jumys isteıtin muz aıdyndary bir keste boıynsha qyzmet kórsetýde. Dálirek aıtsaq, eki saǵattyq bir seanstyń baǵasy balalarǵa - 300-500 teńge, stýdentter men zeınetkerlerge - 500-800-1000 teńge, al úlkenderge 500-1000-1500 teńge bolady. Jappaı syrǵanaý ýaqyty - senbi kúnderi saǵat 11:00-den 23:00-ge, al jeksenbi kúnderi 22:00-ge deıin.
Sonymen qatar, bul jerde jańadan syrǵanaq tebýdi úırenip júrgenderge arnaıy nusqaýshylar qyzmetin kórsetýge árdaıym ázir.
«Biz tańertengi 10-nan keshki 10-ǵa deıin jumys isteımiz. Munda tórt seans bolady, muz aıdynyna jańadan kelgenderge kómegimizdi aıamaımyz. Balalarǵa da, úlken kisilerge de úıretemiz. Biraq, úıretý bizde tegin emes, 30 mınýtqa 1500 teńge alamyz. Biraq, bizge kómek surap kelgenderge qarsylyq bildirmeımiz, bylaı da kómektese beremiz. Adamdarǵa osy jerde konkı tepken óte unaıdy», - dedi nusqaýshylardyń biri Eldana.
Onyń aıtýynsha, muz aıdynynda nusqaýshy bolyp jumys istep júrgenine bir jyldan asqan. Qonaqtardyń arasynan otbasymen keletinderdi jıi kezdestiredi eken. Jalpy, qazir kelýshilerdiń sany kúnnen kúnge artyp keledi. Jeltoqsan, qańtar aılarynda bir seansta ortasha eseppen 100-150, keı kezderi 200 adamǵa deıin jınalatynyn aıtty.
«Búgin biz nemeremizdiń týǵan kúnin atap ótip júrmiz. Nemerem osy jerge keleıik degen soń bas tartpadym, - deıdi kelýshilerdiń biri Erǵalı Mamyrbekov. - Biraq meniń konkı teppegenime kóp jyldar boldy. Umytyp qalyppyn, mine, endi qaıta úırenip kelemin. Qıyndaý árıne. Jasym 60-qa keldi. Zeınetke shyqqan soń jıi kelip turatyn bolamyn», - dedi ol.
