«Almaty Arena Cup» hokkeı týrnırinde astanalyqtar top jardy
ALMATY. QazAqparat - Almatyda «Almaty Arena Cup» hokkeı týrnıriniń jeńimpazdary marapattaldy, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasap.
Baıraqty básekege Astanadan, Almatydan, Óskemennen, Shymkentten, Bishkekten kelgen komandalar qatysty.
Birneshe kúnge sozylǵan jarysta Astanadan kelgen komanda jeńimpaz atandy. Ekinshi oryn Óskemenniń «Torpedo» komandasyna buıyrdy. Úshinshi orynǵa almatylyqtar taban tiredi.
Qalalyq Dene shynyqtyrý jáne sport basqarmasy basshysy orynbasary Rústem Baıseıtovtyń aıtýynsha, qazirgi kezde qalada shaıbaly hokkeıden birneshe balalar men jasóspirimder klýbtary oınap júr.
«Ýnıversıadanyń arqasynda bizde «Almaty Arena» jáne «Halyk Arena» syndy tamasha sport keshenderi paıda boldy. Munda qazir 10 hokkeı klýby jattyǵýda. Biz almatylyq balalardy ózimizge shaqyramyz. Trıatlon, mánerlep syrǵanaý, kerlıng, short-trek, shahmat, karate, qazaq kúresi, júzý sektsııalary ashyldy. Bulardan ózge, aǵylshyn tili klýby, dombyra, klassıkalyq boks, bı, kórkem gımnastıka jáne basqa úıirmeler jumys isteıdi. Oqýshylar men stýdentter úshin 50%-dyq jeńildik bar», - dedi Rústem Baıseıtov.
Búginde Almatyda «Sporttyq Almaty» jáne «Sport meniń aýlamda» baǵdarlamalary júzege asyrylyp jatyr. 500-den astam sport alańdary abattandyryldy. Qalada «Týǵan jer» baǵdarlamasy aıasynda Alataý aýdanynda jeńil atletıkalyq stadıon iske qosylyp, jeńil atletıkalyq manej salynyp jatyr.
