Almaty Arbatynda jaıqalyp turǵan aǵashtardy bireýler kesip tastaǵan
ALMATY. QazAqparat - Almaty Arbatyndaǵy qaraǵashtardyń butaǵyn jeke kommýnaldyq qyzmet jumysshylary kesip tastaǵan, dep habarlaıdy QazAqparat tilshisi.
Zańsyz oqıǵany Arbatqa jaqyn ornalasqan úılerdiń turǵyndary baıqaǵan. Jaıqalyp turǵan jasyl aǵashtardyń butaǵyn shaýyp, japyraǵyn jaıratyp tastapty. Ár jerde jalań dińder ǵana qalǵan. Kommýnaldyq qyzmet jumysshylary apatty jaǵdaıdaǵy ári jas óskinderge kedergi keltiretin kári aǵashtardy kesip jatqandaryn aıtyp aqtalǵan. Alaıda olar qaı mekemede jumys isteıtinin aıtpaǵan. Tipti bul aǵashtardy kesýge berilgen ruqsat qaǵazdary da bolmaǵan.
Qala ákimdigi aǵashtardyń zańsyz kesilgenin rastady.
«12 shilde kúni 4 japyraqty aǵash túriniń zańsyz kesilgeni anyqtaldy. Sondaı-aq qala menshigindegi oryndyqtar men qoqys salǵyshtarǵa, trotýar plıtkasyna zalal kelgen. Quqyq qorǵaý organdary men tabıǵı resýrstar jáne tabıǵat paıdalanýdy retteý basqarmasynyń qyzmetkerleri ákimshilik quqyq buzýshylyqtyń mán-jaıyn anyqtap jatyr. Qoldanylatyn sharalar týraly aldaǵy ýaqytta qosymsha habarlaımyz»,-dedi qalalyq tabıǵı resýrstar jáne tabıǵat paıdalanýdy retteý basqarmasyndaǵylar.
