Almaty Arbatynda eki apta ishinde 98 moped júrgizýshi tártip buzdy
ALMATY. QazAqparat – Almatyda Arbat mańynda jınalyp, turǵyndardyń tynyshtyǵyn buzǵan moped júrgizýshilerimen kúres jalǵasyp jatyr, dep habarlaıdy QazAqparat tilshisi.
Almaty qalalyq polıtsııa departamentiniń málimetinshe, Arbatqa irgeles úılerdiń turǵyndarynan aryz kóptep túse bastaǵan. Sebebi jaıaý júrginshiler aımaǵy azamattardyń súıikti demalys orny ǵana emes, moped júrgizýshileriniń de bas qosatyn ornyna aınalǵan.
«Atalǵan aýmaqta jaıaý patrýl, al irgeles aýmaqta kólik patrýlderi kúsheıtildi. Maqsatty is-shara jumystary bastalǵaly polıtsııaǵa shara qoldaný úshin 39 moped júrgizýshi jetkizildi. Olar QR ÁQBtK-niń 437-baby (Tynyshtyqty buzý) jáne QR ÁQBtK-niń 615-baby (Jaıaý júrginshilerdiń jáne jol júrisine ózge de qatysýshylardyń jol júrisi qaǵıdalaryn buzýy) boıynsha jaýapqa tartyldy. Eki apta ishinde Arbattan bizdiń bólimshege tártip buzǵan barlyǵy 98 moped júrgizýshi jetkizildi», – dedi Almaly aýdandyq polıtsııa basqarmasynyń bastyǵy Esen Ysqaqov.
Málim bolǵandaı, jyl basynan beri QR-nyń jol erejesin buzǵany úshin 4 myń 911 moped júrgizýshisi ákimshilik jaýapqa tartylǵan. Eske salsaq, Arbatta bir túnde tynyshtyq buzǵan 18 moped júrgizýshisi ákimshilik jaýapqa tartylǵan edi.
