Almaty álemdegi úzdik 100 qalanyń qataryna enetin bolady - Saǵyntaev
ALMATY. QazAqparat – Almaty qalasynyń ákimi Baqytjan Saǵyntaev megopolıstiń álemniń úzdik qalalary reıtıngine ený josparlary týraly aıtty, dep habarlaıdy QazAqparat tilshisi.
«Almaty qalasynyń uzaqmerzimdi maqsaty – ómir sapasy boıynsha álemdegi úzdik 100 qalanyń qataryna kirý. Bul – naqty maqsat. Óıtkeni, 2019 jyly Almaty Mercer's Quality of living survey reıtınginde 177-orynda tur», - dedi Baqytjan Saǵyntaev ál-Farabı atyndaǵy QazUÝ-da «Almaty-2050» jobasynyń tanystyrylymy barysynda.
Ákim álemdegi TOP megapolıster reıtıngine kirý jeke maqsat emes ekenin atap ótti. Bul qadam Almatyny qarjy, taýarlar, kásibı qyzmetter men aqparattar aǵymyna qyzmet etetin jahandyq tolyqqandy halyqaralyq habqa aınaldyrý úshin qajet.
«Qala Ortalyq Azııa keńistigindegi iskerlik jáne halyqaralyq baılanystar ortalyǵy bolýy kerek. Osyndaı halyqaralyq deńgeıdegi ıntegratsııalanǵan qalanyń joly aıqyn. Álemdik reıtıngterdiń ólshemderi men kórsetkishteri belgili. Biz aldymyzǵa úlken mindet qoıdyq – halyqaralyq reıtıngterde baǵalanatyn jahandyq qalalardyń álemdik júıesindegi Almatynyń ornyn nyǵaıtý», - dedi ákim.
