Almaty «aqyldy qalalar» reıtıngisinde birinshi oryn aldy

ALMATY. QazAqparat – Almaty Qazaqstandaǵy «aqyldy qalalar» reıtıngisinde birinshi oryn aldy. Bul týraly onlaın brıfıng barysynda qalanyń Tsıfrlandyrý basqarmasynyń basshysy Baıan Qońyrbaev málim etti, dep habarlaıdy QazAqparat tilshisi.

Spıkerdiń aıtýynsha, qazirgi ýaqytta «Elektrondyq úkimettiń» servıstik ıntegratory «Zerde» holdıngimen birlesip Almaty ákimdiginiń AT-arhıtektýrasyn ázirleýde. Osy maqsatta aqparattyq júıelerdi túgendeý, aǵymdaǵy ahýaldy taldaý júrgizildi jáne odan ári damý basymdyqtary aıqyndaldy.

«2020 jyldyń jarty jyldyǵynyń qorytyndysy boıynsha Almaty qalasy elimizdiń barlyq óńirleri arasynda «aqyldy» qalalar reıtınginde birinshi orynǵa ıe boldy. 2019 jyly biz ekinshi orynda edik. Bul reıtıngti aqparattandyrý salasyndaǵy ýákiletti organ «aqyldy» qalalardyń etalondyq standarty negizinde júrgizedi. Bul standart qala tirshiliginiń 11 baǵyty boıynsha 100-den astam jobany qamtıdy», – dep atap ótti B. Qońyrbaev.

Qazirgi ýaqytta Almaty qalasy ákimdiginiń memlekettik qyzmetter túrleriniń 90% - elektrondy. Atap aıtar bolsaq, balabaqsha.open-almaty.kz, bilimalmaty.kz aqparattyq júıesi, «Damýmed» medıtsınalyq aqparattyq júıesi, «InfoLab» AJ, Avtomatty dıspetcherlik aqparattyq júıesi, «Emdeýge jatqyzý bıýrosy» portaly.

«Eger sizde qyzyqty qosymsha nemese jańa aqparattyq júıeni qurý ıdeıalary bolsa, olardy portalǵa ornalastyra alasyz. Eger sizderdiń usynystaryńyz qyzyqty bolsa, biz olardy júzege asyrýǵa kómektesemiz. AT-mamandaryn, kreatıvti tsıfrlyq uıymdastyrýshylardy bizdiń portaldy óz ıdeıalaryn ornalastyrý úshin paıdalanýǵa shaqyramyz», — dep túıindedi spıker.