«Almaty-Aqtóbe» júrdek poıyzy kúnara qatynaıdy

ASTANA. QazAqparat - 7 qańtardan bastap, «Almaty-2-Aqtóbe» baǵytyndaǵy №49/50 júrdek poıyzynyń ekinshi quramy jolǵa shyǵady, dep habarlady «Jolaýshylar tasymaly» AQ baspasóz qyzmetinen.

Kompanııa aqparatyna qaraǵanda, buǵan deıin bul poıyz 4 kúnde bir ret qatynaıtyn. Endi erteńnen bastap, júrdek poıyz kúnara júretin bolady. Jolǵa 29 saǵat ýaqyt ketedi. Al qarapaıym jolaýshylar poıyzy bul aralyqty 43 saǵatta júrip ótetin.

Júrdek poıyzdyń ekinshi quramynda 29 zamanaýı «Tulpar-Talgo» vagondary bar. Onyń 2-eýi - «Grant», 2-eýi - «Bıznes», 20-sy - «Týrıst» sanatynda. Munan bólek, 2 vagon-meıramhana men 3 tehnıkalyq vagon da bar.

Aıta keterligi, bul poıyzǵa da Jańa jyl qarsańynda «Tulpar-Talgo» poıyzdaryna engizilgen 40 paıyzǵa deıingi jeńildikter qarastyrylǵan.

Máselen, poıyz jóneltiletin kúni «Týrıst» sanatyndaǵy vagonǵa bıletti 8500 teńgege satyp alýǵa bolady. Al «Qurmet» jáne «Jastar» jeńildik kartalary bar zeınetkerler men stýdentter bul bıletti 30 paıyzdyq jeńildikpen 5950 teńgege alady. Dál osy bıletti erte satyp alǵan jolaýshy qaltasynan ne bári 5500 teńge shyǵarady.