Almaty, Aqtóbe, Qaraǵandy jáne Mańǵystaý oblystary bıýdjetti durys ıgermegen
«Memlekettik bıýdjet shyǵystary 98,7%-ke, respýblıkalyq bıýdjettiń shyǵystary 99,6%-ke, jergilikti bıýdjetterdiń shyǵystary 98%-ke atqaryldy. Respýblıkalyq bıýdjet boıynsha 10 trln teńge jumsaldy. Jumsalmaı qalǵan 41 mlrd teńge bar, onyń ishinde 10 mlrd teńge únemdelgen, al 31 mlrd teńge ıgerilmeı qalǵan», - dedi Qarjy mınıstri Úkimettiń búgingi otyrysynda.
Igerilmeýdiń neǵurlym iri somalary burynǵy bilim jáne ǵylym, ishki ister, qarjy jáne tótenshe jaǵdaılar mınıstrlikterinde baıqalǵan. Onyń negizgi sebepteri: sharttar jasasý rásimderin uzaq ýaqyt júrgizý, oryndalǵan jumystar aktilerin, shot-faktýralardy ýaqtyly usynbaý, tólem shottaryn kesh usyný, tólem naqty kórsetilgen qyzmet kólemi boıynsha júrgizilýi, esepti aıda qarajattyń shyǵyndalýyna qajettiliktiń bolmaýy.
Sonymen birge, jergilikti bıýdjetterdiń shyǵystary 5,5 trln teńge bolsa, onyń 113 mlrd teńgesi jumsalmaı qalǵan.
«Bıyl óńirlerge 3,3 trln teńge nysanaly transfertter kózdelgen, 1 tamyzǵa 1,6 trln teńge bólingen jáne onyń 97%-i ıgerilgen. Jumsalmaı qalǵan 48 mlrd teńgeniń 5 mlrd teńgesi – únemdelgen qarjy, al 43 mlrd teńge ıgerilmegen. Ásirese, Mańǵystaý, Almaty, Aqtóbe jáne Qaraǵandy oblystary qarajatty durys ıgermegen. Onyń negizgi sebepteri: jobalaý-smetalyq qujattamany túzetý, oryndalǵan jumystar aktilerin ýaqtyly usynbaý, konkýrstyq rásimderdi uzaq ótkizý, qazynashylyq organdaryna tóleýge beriletin shotty kesh usyný», - dep túsindirdi E. Jamaýbaev.
Buǵan deıin Qarjy mınıstri memlekettik bıýdjetke 8 trln 463 mlrd teńge kiris túsip, jospardyń 105,1%-ke oryndalǵanyn aıtqan edi.
