Almaty ákiminiń orynbasary jol belgileri nege kúzde syzylmaıtynyn túsindirdi

ALMATY. QazAqparat - Almatyda jol belgileri 15 naýryzdan bastap syzylady. Bul týraly qala ákiminiń orynbasary Erlan Áýkenov Feısbýktegi paraqshasynda túsindirdi, dep habarlaıdy QazAqparat tilshisi.

Onyń aıtýynsha, kóp adam «jol belgileri nege qysta, erte kóktemde syzylmaıdy?» degen saýal qoıady. Alaıda jol belgilerin júrgizý úshin qolaıly aýa raıy qajet.

«Asfaltta jol belgilerin syzý úshin onyń temperatýrasy +10 gradýstan joǵary bolýy kerek. Sondyqtan erte kóktemde, qystyń sońǵy aıynda jol belgilerin júrgizýge bolmaıdy. Bıyl 54 magıstraldy jáne aýdandyq kóshede jol belgilerin júrgizý 15 naýryzdan 20 maýsymǵa deıin jalǵasady», - dedi Erlan Áýkenov.

Sonymen qatar, 29 tamyzda 19 kóshede jańa jol belgileri syzylady. Sebebi, bul kóshelerde jol jóndeý jumystary júrgiziledi.

«Ortasha jóndeý degenimiz - betki qabaty túgel súrilip, asfalttiń jańa qabaty tóseledi degen sóz. Barlyq ortasha jóndeý jumystary 20 tamyzǵa deıin josparlanǵan. Jol belgileri jóndeý bitken soń 10 kún ótkende jasalady. Sebebi, 8-10 kún bıtýmnyń býy shyǵýy kerek. Áıtpese boıaý tez ketip qalady», - dedi ol.

Oqý jylyna daıyndyq retinde 15 shildede mektep, balabaqshalar men aýrýhana, emhanalar aldyndaǵy barlyq «zebralar» jańartylady. Jyl sońyna deıin 2,3 myń jol belgisi ornatylady.

«Qazir biz 519 belgi ornattyq. Naýryz aıynyń sońyna deıin 237 belgi ornyn tabady. Qalǵan 1,5 myń belgi tamyzdyń sońyna deıin qoıylady. Bul jumystardy bıyl «SMEÝ Almaty» JShS merdigerlik kompanııasy atqaratyn bolady. Eger istemeı qalǵan baǵdarsham, súrtilip ketken jol belgilerin kórgen adam bolsa, «Open Almaty» men Instagram arqyly habarlasa alady», - dedi sheneýnik.