Almaty ákiminiń orynbasary Ortalyq qalalyq klınıkalyq aýrýhana qyzmetkerlerimen onlaın kezdesý ótkizdi
ALMATY. QazAqparat - Almaty qalasy ákiminiń orynbasary Erjan Babaqumarov beınekonferentsııa baılanys rejıminde Ortalyq qalalyq klınıkalyq aýrýhananyń ujymymen kezdesý ótkizdi, dep habarlaıdy QazAqparat tilshisi.
Kezdesýge Densaýlyq saqtaý vıtse-mınıstri Lázzat Aqtaeva, sondaı-aq qalalyq Qoǵamdyq densaýlyq basqarmasy men Taýarlar men qyzmetterdiń sapasy men qaýipsizdigin baqylaý departamentiniń basshylary, aýrýhananyń bas dárigeri qatysty.
Kezdesý kezinde naýqastar men aýrýhana qyzmetkerlerin ornalastyrýdyń, qaýipsizdiktiń sanıtarlyq-epıdemıologııalyq sharalaryn saqtaý ahýaly talqylandy.
«Biz qalalyq aýrýhananyń dárigerleri men medıtsınalyq qyzmetkerlerin qandaı jaǵdaı alańdatatynyn, qalyptasqan jaǵdaıdy tikeleı rettep, oryn alǵan máselelerdi sheshý úshin barlyq sharalardy qabyldaý maqsatynda jınalyp otyrmyz», – dedi Erjan Babaqumarov.
Sondaı-aq, ol aýrýhana ujymyna juqtyrý jaǵdaılaryna qaramastan, sabyrlyq tanytyp, jasaǵan jumystary úshin alǵysyn bildirdi.
Onlaın rejimde hırýrgııa bóliminiń meńgerýshisi N. Kemelhanov, fızıoterapııa bóliminiń meńgerýshisi A. Tórequlova, nevrologııa bóliminiń meńgerýshisi G. Qusaıynova, reanımatsııa bóliminiń meńgerýshisi G. Berdalına, travmatolog-dáriger G. Egemov pikir bildirdi.
Kezdesý qorytyndysynda qala ákiminiń orynbasary Erjan Babaqumarov kóterilgen máselelerdi sheshý boıynsha birqatar naqty tapsyrmalar berdi.
Aıta ketý kerek, Almatyda koronavırýs juqtyrǵan medıtsına qyzmetkerleriniń sany 234 jetken bolatyn.
Búgin jedel járdem qyzmetiniń taǵy 4 qyzmetkeriniń taldaýy oń nátıje kórsetti.
Munyń aldynda QR Densaýlyq saqtaý vıtse-mınıstri Kamaljan Nadyrov medıtsına qyzmetkerleriniń arasynda vırýs nege órship bara jatqandyǵyn túsindirgen bolatyn.
Bul jaǵdaıǵa baılanysty QR DSM mamandarynan arnaıy komıssııa quryldy. Komıssııa epıdemıologııalyq tekserýdi bastady.
