Almaty ákiminiń buıryǵymen órtengen páterler men avtokólikterdiń ıelerine materıaldyq kómek kórsetiledi
ALMATY. 27 maýsym. QazAqparat - Janarmaı tasıtyn júk kóligi jarylǵan jerge alǵash kelgenderdiń biri Almaty qalasynyń ákimi Ahmetjan Esimov boldy. Qala basshysy búgin tańerteń S.Seıfýllın jáne Qabanbaı batyr kósheleriniń qıylysynda bolǵan apattyń sebebi men aýqymyn anyqtaýmen aınalysatyn arnaıy komıssııa qurýdy buıyrdy.
Buǵan deıin habarlanǵandaı, tańǵy saǵat 10.00-de iri jol-kólik oqıǵasy oryn aldy. «Helios» kompanııasyna tıesili janarmaı tasıtyn júk kóligi aýdarylyp, jaryldy. Kóliktegi janarmaı jerge tógildi. Nátıjesinde laýlaǵan órt jýyq mańdaǵy aýmaqty sharpydy.
Aldyn-ala málimetterge qaraǵanda, segiz avtokólik órtte qalǵan bolyp shyqty. Jalyn, sondaı-aq, 9 qabatty turǵyn úıge ótken. Qutqarýshylardyń aqparatyna qaraǵanda, 40 adam qaýipsiz aımaqqa kóshirilgen, qutqarýshylar segiz adamǵa kómektesti. Janarmaı tasıtyn júk kóliginiń júrgizýshisi oqıǵa ornynda qaza tapty, basqa qurbandar joq.
Qazirgi ýaqytta órt sóndirý jalǵasýda. TJ ornynda shamamen 40 tehnıka birligi jáne 350-den astam mamandar jumys isteýde. Qala basshysynyń ókimimen qurylǵan arnaıy komıssııa oqıǵanyń sebebin anyqtaýda, sondaı-aq, órtten kelgen zalaldy esepteýde. Komıssııa jumysynyń nátıjesi boıynsha zardap shekkenderge aıypty adamnyń tarapynan ótemaqy tólenbek. Ákim, sondaı-aq, janyp ketken avtokólikter men páterlerdiń ıelerine materıaldyq kómek kórsetýdi tapsyrdy.
Barlyq turǵyndar aman, jaraqat alǵandar joq. Úı turǵyndary jaqyn jerdegi mektepke ornalastyryldy.
