Almaty ákimi jumyssyz rejimniń 13 sáýirge deıin uzartylǵanyn eske saldy
ALMATY. QazAqparat – Almatydaǵy 5 sáýirge deıin uıymdardyń jumysyn ýaqytsha toqtatý týraly sheshim keıinge shegerildi. Endi qalanyń tynys-tirshiligin qamtamasyz etpeıtin barlyq kásiporyndar men uıymdar úshin jumyssyz rejim 13 sáýirge deıin uzartyldy, dep habarlaıdy QazAqparat tilshisi.
Almaty qalasy ákimdiginiń baspasóz qyzmetiniń habarlaýynsha, mundaı sheshimdi QR Prezıdenti janyndaǵy tótenshe jaǵdaı rejimin qamtamasyz etý jónindegi Memlekettik komıssııa qabyldady.
«Jańa aptanyń qarsańynda Memkomıssııanyń sheshimimen qalanyń tynys-tirshiligin qamtamasyz etpeıtin barlyq kásiporyndar men uıymdar úshin jumyssyz rejim 13 sáýirge deıin uzartyldy. Ózin-ózi oqshaýlaý rejimin saqtańyzdar. Polıtsııa departamentine baqylaýdy kúsheıtýdi tapsyramyn»,– dep jazdy qala ákimi Twitter -degi paraqshasynda. .
Bul rejım adamdar men jeke kóliktiń qala ishinde qajettiliksiz júrip-turýyna tyıym salýdy kózdeıdi. Azyq-túlik pen dári-dármekti alýǵa turǵylyqty jerge jaqyn ornalasqan dúkender men dárihanaǵa shyǵýǵa ruqsat etiledi. Sondaı-aq, úı janýarlaryn serýendetýge ruqsat bar.
65 jastan asqan turǵyndarǵa dalaǵa shyǵýǵa bolmaıdy. Sondaı-aq kámeletke tolmaǵandardyń qalada eresektersiz júrýine ruqsat joq.
Azyq-túlik, dári-dármek jáne birinshi kezektegi qajetti zattardy jetkizý qyzmetteri 09.00-den 22.00-ge deıin jumys isteıdi.
Bul rette barlyq uıymdar, kásiporyndar men qalalyq qyzmetter jumysqa tartqan qyzmetkerleriniń sanıtarlyq jaǵynan qorǵalýyn kúsheıtilgen rejimde qamtamasyz etýi tıis.
Tótenshe jaǵdaı rejimin buzǵany jáne kóshede sebepsiz júrgeni úshin eskertý, 26510 teńge kóleminde aıyppul nemese 15 táýlikke bas bostandyǵynan aıyrý túrindegi ákimshilik jaza qarastyrylǵanyn atap ótken jón.
Menshik nysanyna qaramastan uıymdar men kásiporyndardyń basshylary kórineý jalǵan aqparat bergeni, sondaı-aq qyzmetkerlerge anyqtama jáne óndiristik nemese qyzmettik qajettilikten týyndamaǵan qyzmetkerlerdiń qozǵalýy týraly derekter bergeni úshin qylmystyq jaýapqa tartylady.
Shekteý qalalyq basqarý organdaryna, azyq-túlik, medıtsınalyq nysandarǵa, qalanyń úzdiksiz tynys-tirshiligin jáne qaýipsizdigin qamtamasyz etetin qyzmetter men BAQ-qa qoldanylmaıdy.
Almaty qalasy polıtsııa departamentiniń málimeti boıynsha, tótenshe jaǵdaı rejimin buzǵany úshin aǵymdaǵy jyldyń 19 naýryzynan bastap 336 adam QR ÁQBtK-niń 476-baby boıynsha ákimshilik jaýapkershilikke tartyldy, onyń 113-i sot sheshimimen ákimshilik qamaýǵa alynsa, qalǵandaryna aıyppul salyndy.
Aǵymdaǵy jyldyń 5 sáýirindegi málimetter boıynsha, Almatyda COVID-2019 juqtyrýdyń 116 oqıǵasy zerthanalyq túrde rastaldy. Aǵymdaǵy jyldyń 5 sáýirinde saǵat 20.00-degi jaǵdaı boıynsha qalada koronavırýstyq ınfektsııany juqtyrý oshaǵynyń 33 aımaǵy bar. Inkýbatsııalyq kezeńniń aıaqtalýyna baılanysty oshaqtyń 14 aımaǵynan shekteý sharalary alynyp tastaldy.
Sýyq tııý belgileri paıda bolǵan jaǵdaıda 103-ke qońyraý shalyńyz. Anyqtama úshin 1406 call-ortalyq jáne 1308 nómiri boıynsha Open Almaty qoǵamdyq qabyldaýy jumys isteıdi.
