Almaty ákimi jóndeýden ótken «Astana» alańyn kórdi
ALMATY. QazAqparat - Almatyda jaıaý júrginshilerge kóbirek jaǵdaı jasaý úshin qaıta jóndeýden ótken «Astana» alańy paıdalanýǵa berildi. Túnde janyp turatyn eki qurǵaq fontany bar alańnyń ashylý saltanatyna megapolıs ákimi Baýyrjan Baıbek qatysty, dep habarlaıdy QazAqparat tilshisi.
«Astana» alańynyń jóndeý jumystary merziminen buryn aıaqtaldy. Onda kólik qozǵalysyna arnalǵan aýmaq qysqartylyp, jaıaý júrginshilerge, alańda túrli sharalar ótkizýge jaǵdaı jasalǵan.
Avtokólik jolaǵynan bosaǵan keńistikterge velojol jasalyp, granıt tastar tóseldi. Satylar jańaryp, túnde janyp turatyn eki qurǵaq fontan ornatyldy.
Klassıkalyq stılde jasalǵan jaryq kózderi óte ádemi, alańǵa ýrnalar, shaǵyn dúkender, avtorlyq kishi pishindi arhıtektýralyq formalar qoıylǵan.
Alańnyń ońtústik jaǵyndaǵy trotýarǵa tas tóselip, jıegi abattandyryldy.
Qaıta jasalǵan «Astana» alańyn ashý barysynda qala turǵyndary men qonaqtary úshin teatrlandyrylǵan kórinister, bı perfomanstary, fotoaımaqtar men retroınstallıatsııalar uıymdastyryldy.
Aıta keterligi, júrginshilerge basymdyq beretin Kabanbaı batyr, Panfılov, Jibek joly jáne Gogol kóshelerindegi jumystar odan ári jalǵasýda. Kire berister tegistelýde, olar biryńǵaı stılmen jasalýda, ǵımarattardyń syrtqy kelbeti jańarýda. Jasyl jelekti avtomatty túrde sýarýdyń jańa júıesi tartylǵan, aryqtarǵa jańa lotoktar tóselgen, birqatar ýchaskelerge tas tóseý aıaqtalǵan, qurǵaq fontandar, júrginshi baǵdarshamy, shyraqtar, kishi pishindi arhıtektýralyq formalar ornatyldy.
Qalalyq ákimdiktiń baspasóz qyzmetiniń habarlaýynsha, qala kúnine oraı barlyq obektilerde arhıtektýralyq formalar qoıý, jasyl jelekter otyrǵyzý, jaryq qoıyp, qurǵaq fontandar ornatý, demalys aımaǵyn, balalar alańdaryn, velojoldardy jasaý jumystary tolyq aıaqtalmaq.
Aǵash otyrǵyzý maýsymy jasyl jelektiń tereń tamyr jaıýy úshin kúz mezgilinde atqarylady. Jalpy, 330 myń sharshy metrden astam aýmaqqa aǵash-taldar otyrǵyzylyp, jasyl-jelekter egilmek.
