Almaty ákimi JEO-2-niń gazǵa ótýin jyldamdatý úshin Prezıdentten kómek surady
ALMATY. QazAqparat – Almaty ákimi Baqytjan Saǵyntaev Memleket basshysy Qasym-Jomart Toqaevtan «Samuryq-Qazyna» Ulttyq ál-aýqat qoryna JEO-2-niń gazǵa ótýin jyldamdatýdy tapsyrýyn surady, dep habarlaıdy QazAqparat tilshisi.
Ákim ekologııa máselesi barlyq qala turǵyndaryn alańdatyp otyrǵanyn atap ótti. Qaýipti faktorlardyń biri – zııandy zattardyń shyǵarylýy.
«2018 jyly qorshaǵan ortaǵa shyǵarylǵan zııandy zattardyń jalpy kólemi 123 myń tonnany qurady, onyń ishinde JEO-2 úlesi 27% boldy. Qazirgi ýaqytta «Samuryq-Energo» AQ qoldanystaǵy stansyny gazǵa aýystyrýdy kózdeıtin tehnıkalyq-ekonomıkalyq negizdeme ázirleýde. Jobany iske asyrý arqyly atmosferadaǵy zııandy shyǵaryndylardyń úlesin 17 ese azaıtýǵa múmkindik bar. Osy jobanyń áleýmettik mańyzyn eskere otyryp, «Samuryq-Qazynaǵa» sáıkes qujattamalar ázirlenip bolǵan soń barlyq protsedýralardy tezdetýdi tapsyrýyńyzdy suraımyn», - dedi Almaty ákimi Baqytjan Saǵyntaev Memleket basshysynyń qatysýymen ótip jatqan Almatyny áleýmettik-ekonomıkalyq damytýǵa arnalǵan otyrysta.
Avtory Danııar Dáýitálıev
