Almaty ákimi jas otbasylarǵa páter kiltterin tabystady
ALMATY. QazAqparat - Almatyda QR Táýelsizdik kúni qarsańynda jastarǵa nesıe berýdiń «Almaty jastary» baǵdarlamasy boıynsha páter kiltteri men turǵyn úı sertıfıkattary tabys etildi, dep habarlaıdy QazAqparat tilshisi.
Bul ómirsheń baǵdarlamany júzege asyrýǵa jergilikti bıýdjetten 1 mlrd teńge bólingen bolatyn.
Almaty ákimdigi men «Turǵynúıjınaqbanki» AQ birigip qolǵa alǵan «Almaty Jastary» baǵdarlamasynyń arqasynda 35 jasqa deıingi jastar páterge qol jetkizdi. Baspana jastarǵa bastapqy jarna tólemese de nesıe eń tómengi paıyzymen beriledi.
«Turǵyn úımen qamtamasyz etý - bul jastarǵa qatysty mańyzdy máseleniń biri, olardyń jumysqa ornalasýy, bilim alýy únemi jiti nazarda, sondyqtan «Almaty Jastary» baǵdarlamasynyń aıasynda jyl sońyna deıin 100 almatylyq jas otbasy jeke páterleriniń kiltterin alady. Jastar baǵdarlamasy boıynsha berilgen nesıege Almatydan alǵashqy úıdi satyp alýǵa bolady, sóıtip aqsha qalada qalady. ıAǵnı, osy aqshadan qurylysshylarǵa jalaqy tólenedi, kásiporyndarǵa tapsyrys beriledi, qurylys kompanııalary qala bıýdjetine salyq tóleıdi», - dedi Almaty ákimi Baýyrjan Baıbek.
Ákim «Nurly Jer» baǵdarlamasy boıynsha salynǵan 6 myń páter kezekte turǵandar arasynda bólingenin aıtty. Jyl qorytyndysy boıynsha Almatyda kezekte turǵan árbir tórtinshi otbasy jańa úıge ıe bolady.
«Turǵynúıqurylysjınaqbanki» AQ tóraǵasynyń orynbasary Janar Jubanııazova «Almaty Jastary» baǵdarlamasynyń barynsha ashyq bolýyn qamtamasyz etý úshin arnaıy www.almaty-zhastary.kz portaly ashylǵanyn, qatysýshylar soǵan ótinish bergenderin aıtty.
Sarapshylar baldyq júıe arqyly almaty jastary men jas otbasylarǵa qoldaý kórsetti. Mysaly, tuńǵysh bala úshin 10, keıingi ár bala úshin 15 baldan berildi. Jubaılyq ómirdiń ár jylyna eki baldan qosyldy.
Qosymsha balalarǵa menshik túrine qaramastan qalanyń áleýmettik salasynda jumys isteıtin jastar ıe boldy. Múmkindigi shekteýli jandarǵa qosymsha 10 baldan berildi. Almatynyń bıznes qalasy ekendigi eskerilip, jas kásipkerlerge de qoldaý kórsetildi, mundaǵylar ár jumys istegen jyldary úshin bir jarym baldan aldy.
Jańa páterlerdiń kiltterin alǵashqy bolyp alǵandar qatarynda Ortalyq qalalyq klınıkalyq aýrýhana dárigeri Ásııa Mırtaeva, Qalalyq adam reprodýktsııasy ortalyǵy zerthanasynyń mamany Raıgúl Janǵalıeva, «AvtoGazAlmaty» JShS ınjener-operatory Nurlan Saparov jánge basqalary bar. Jalpy, baǵdarlama máresine 72-den 162 deıin ball jınaǵandar jetti.
Qala ákiminiń qolynan páter kiltin konkýrsta 92 ball jınaǵan jedel járdem feldsheri Oksana Shefer aldy.
«Keler jyly da Almatyda jastar úshin turǵyn úı alýǵa jeńil nesıe beretin osy Baǵdarlamanyń jalǵasýyn qalaımyn. Páter alǵanymdy bilgen meniń áriptesterim, dostarym atalǵan baǵdarlamaǵa zor qyzyǵýshylyq tanytýda. Óz páterimizge ıe bolǵanymyz úshin biz baqyttymyz, barlyqtaryńyzdy aldaǵy merekelermen quttyqtaımyn», - dedi Oksana Shefer.
Eske salsaq, Elbasynyń tapsyrmasy boıynsha 2017 jyl Almatyda Jastar jyly bolyp jarııalanǵan edi. Osy baǵytta Almatyda tuńǵysh ret «2020 jylǵa deıin jastardy qoldaýdyń jol kartasy» jasaldy. «Almaty»ÁQK» AQ-nyń qarjylandyrýymen jataqhana salý jobasy qolǵa alyndy. 2 000 oryndy tórt jataqhana qurylysy aıaqtalyp qaldy. Keler jyldan bastap 2,4 myń oryndy taǵy eki jataqhana qurylysy bastalady. Jalpy, 2020 jylǵa deıin qalada 7 myń oryndy 12 jataqhana salynady.
