Almaty ákimi: Jappaı bárin qurtpaqshy deý – haıp qýǵandardyń sózi

ALMATY. QazAqparat – Almaty ákimi Baqytjan Saǵyntaev qala jurtshylyǵymen kezdesýdi dástúrge aınaldyrdy. Búgin Medeý aýdanynyń turǵyndarymen kezdesip, olardy tolǵandyrǵan máselelerdi talqylady, dep habarlaıdy QazAqparat tilshisi.

Megapolısti damytýdyń basty máseleleri jaıly aıta kele, ákim shaǵyn jáne orta bızneske qoldaý kórsetýdiń mańyzyna erekshe toqtaldy. Onyń aıtýynsha, halyqtyń úshten biri kásipkerlikpen aınalysady. Ári ShOB qalanyń jalpy óńirlik óniminiń 40%-yn beredi, qala bıýdjetiniń 60%-yn qalyptastyrady.

Kásipkerlikti qoldaý sharalarynyń arasynda «Almaty» áleýmettik kásipkerlik korporatsııasyn túrlendirý, «Almaty Invest» Investıtsııalardy tartý ortalyǵynyń qurylýy, qalanyń 6 aýdanynda fılıaly bar «Qolday» kásipkerlik ortalyǵyn aıtýǵa bolady. Shaǵyn jáne orta bıznesti nesıelendirýge arnalǵan, qalanyń qaq ortasynda 7 paıyzdyq, shetinde 2 paıyzdyq dıfferentsııalanǵan mólsherleme saıasatyn ustanatyn «Almaty Finance» kompanııasy jáne «Almaty» shaǵyn nesıe uıymy paıda boldy.

«Almaty bıznes-2025» baǵdarlamasy boıynsha kásipkerler oqytylýda.

Ákim qarjydan bólek, kásipkerlerge ınfraqurylymdyq sheshimderi bar logıstıka boıynsha da qoldaý kórsetiletinin aıtty. Mysaly, Baıtursynuly jáne Qonaev kóshelerimen júretin velojolaqtar baǵdary da osy maqsatta ózgertildi.

Baqytjan Saǵyntaev áleýmettik jeli qoldanýshylarynyń birazy ákimdiktiń bastamalaryn ádeıi burmalap túsindiretinine shaǵymdandy. Sońǵy kezde «Tımırıazev kóshesinen BRT baǵdary alynady, Panfılov kóshesiniń kontseptsııasy qaıta qaralady, buzylǵan qorshaýlar qaıta qalpyna keltiriledi, qala kóshelerinde kólikke arnalǵan jolaqtar joıylady» degen sııaqty sybystar tarady.

«Keı jýrnalıster maǵan keledi, áleýmettik jelide jazady. Osynyń bári bos sóz ekenin aıtqym keledi. Bárin jappaı jabý, joıý, qurtý eshkimniń oıynda joq. Osyndaı sybystardy taratyp júrgender bosqa haıp jasap júr», - dedi ákim.

Avtory Danııar Dáýitálıev