Almaty ákimi jańa modýldik aýrýhananyń vıdeosyn jarııalady
«Buryn josparlanǵandaı, COVID-19-ben qarsy is-qımylda tósek-oryn qýatyn kúsheıtý úshin 500 oryndy jańa juqpaly aýrýlar aýrýhanasy daıyndaldy», - dep jazdy ákim Instagram-da.
Beınerolıktegi kadr syrtyndaǵy daýysqa sáıkes, bul aýrýhana Qazaqstandaǵy eń iri COVID-19 gospıtali bolyp tabylady.
Aýrýhanada eldegi eń úlken reanımatsııalyq palata jasaqtalǵan.
Ár palatada 3 túrli gazdyń shyǵýyna múmkindik beretin júıe ornatylǵan. Barlyq kommýnaldyq júıe tazartý qurylǵysymen jasaqtalǵan. Bul aýrýhananyń jumysynyń qaýipsizdigin bildiredi. Sondaı-aq, munda medıtsınalyq qoqystardy zararsyzdandyrý men joıýdyń zamanaýı júıesi ornatylady.
Aıta ketý kerek, bul Almatydaǵy ekinshi gospıtal bolmaq. Birinshisi 18 kúnde salynyp, 24 sáýirde paıdalanýǵa berilgen bolatyn.
Ekinshi gospıtaldiń qurylysy tamyzdyń basynda bastaldy.
«COVID-19-ǵa qarsy is-qımyl, sharalar aıasynda oryn sanyn arttyryp, qýattylyqty kúsheıtýdi jalǵastyramyz. Bul rette 300 tósek-orynǵa arnalǵan (onyń 30-y reanımatsııalyq) ekinshi modýldik juqpaly aýrýlar aýrýhanasynyń qurylysy bastaldy. Medıtsınalyq mekeme medıtsınalyq gaz júıesimen, sondaı-aq KT, ÝDZ jáne rentgen apparattarymen qamtamasyz etilmek», - dedi ákim.
B.Saǵyntaevtyń aıtýynsha, gospıtal tolyǵymen tsıfrlyq negizde, ıaǵnı tekserý - baılanyssyz ádispen, al baqylaý beınebaılanys arqyly júrgiziledi. Avtomattandyrylǵan júıe naýqastyń jaǵdaıyn jedel baqylaýǵa, sondaı-aq «jasyl» jáne «qyzyl» aımaqtar boıynsha qyzmetkerlerdiń qozǵalysyn baqylaýǵa múmkindik beredi.