Almaty ákimi jańa mekteptiń qurylysyna jer telimin izdestirýdi tapsyrdy
Qala ákiminiń turǵyndarmen kezdesýinde qoǵamdyq kólikti jańǵyrtý, jańa mektepter men joldar salý, qala bazarlaryn qaıta jóndeý máseleleri qaraldy.
Mysaly, úsh balanyń anasy Álııa Jalǵasbaeva qala basshysyna «Darhan» yqsham aýdanynda mektep salý ótinishin bildirdi. Qazirgi kezde Alataý aýdanynda oqýshy ornynyń jetispeýshiligi aıqyn baıqalady. Óıtkeni, tek sońǵy úsh jyl ishinde munda oqýshy sany myńnan asyp ketken. Bul máseleni sheshý úshin Baýyrjan Baıbek myń oryndy mektep salýǵa qatysty jer telimin izdestirýdi jáne qajetti jobalyq-smetalyq qujattama ázirleýdi tapsyrdy.
«Qazirgi kezde salynyp jatqan turǵyn úılerdiń 70% jańa qosylǵan aýdandarǵa tıesili. Qajetti ınfraqurylym jasalýda, Indýstrıaldy aımaq damyp, jańa jumys oryndary ashylýda. Keler jyly jol jóndeýge qarjy bólinedi, jaryq kózderi ornatylady. «Darhan» yqsham aýdany týraly aıtar bolsaq, men bul problemany bilemin. Qalada bos jatqan jer telimderi joqtyń qasy, sonyń saldarynan jańa áleýmettik qurylys salý qıyndaýda. Men mektep salatyn jer ýchaskesin izdestirýdi, soǵan qatysty JSQ daıyndaýdy tapsyrdym. Jalpy, keler jyly biz 8 jańa mektep salatyn bolamyz», - dedi qala basshysy.
Al zaǵıptardyń «Kómektes» qoǵamdyq qorynyń basshysy Aleksandr Sapelkın avtobýstar baǵytynyń nómirin jáne aıaldamalaryn daýystap habarlaıtyn qondyrǵylar ornatý týraly usynysyn jetkizdi. Ol sonymen qatar Bostandyq aýdanynyń «Alataý» eldimekenine jańa avtobýs baǵytyn ashýdy surady.
«Avtobýstardyń 100% daýystap habarlaý qondyrǵylary ornatylady. Sondaı-aq jaqyn arada «Alataý» yqsham aýdanyna qatynaıtyn jańa baǵyt ashylatyn bolady. Jalpy, qoǵamdyq kólik salasynda problemalar óte kóp. Sondyqtan biz úlken kólik reformasyn júrgizip otyrmyz. Men ózim Gagarın-Ótepov kósheleriniń boıynda turdym. Kúnde tańerteńgisin oqýǵa, odan soń jattyǵýǵa baratynmyn, úıge jıi kesh oralatynmyn. Keıde jaıaý júretinmin, óıtkeni, keshke qaraı avtobýstar júrmeıtin. Abylaı hannyń, odan soń Abaıdyń, Jeltoqsan men Tımırıazevtyń boıymen Ótepov kóshesine deıin jaıaý júretin edim. Men eski avtobýstardy jaqsy bilemin, ishi lyq toly bolatyn, beketterge toqtamaıdy, daýystap habarlaý degen túske enetin. Eki jyl ishinde biz tasymaldaýshylardyń barlyq kóleńkeli ekonomıkasyn syrtqa shyǵardyq, tıisti ınfraqurylymdy jasadyq. 600-den astam jańa avtobýs aldyq. Mamyrǵa deıin taǵy 716 jańa avtobýs satyp alý josparlanǵan. Biz qazir adamdardyń avtobýs beketterinde uzaq turyp qalmaýlary, qoǵamdyq kóliktiń der kezinde kelýi ári túnge deıin júrýi, júrgizýshilerdiń baısaldy bolýy úshin naqtyly jumystardy atqarýdamyz. Búgingi kúni jaıaý júrginshilerge de jaıly jaǵdaılar jasalýda, bala arbasyn jetektegen analar, ata-analar, múgedekter men velosıpedshiler esh kedergisiz júrýde», - dedi ol.
Qala turǵyndarymen kezdesý kezinde Baýyrjan Baıbek «Arystan» bazaryn jańǵyrtýǵa jáne «Kók qaınar» yqsham aýdanynda jańa jol salýǵa ýáde etti.
Budan ózge, partııanyń qoǵamdyq qabyldaýyna «Skybar» túngi klýbynyń qoǵamdyq tártipti jıi buzatyndyǵy týraly kóptegen shaǵym túsýi saldarynan atalǵan túngi klýbqa keshendi tekserý júrgiziletin bolady.
