Almaty ákimi zańsyz qurylys úshin qolastyndaǵylardy synǵa aldy
ALMATY. QazAqparat – Almaty ákimi Baqytjan Saǵyntaev qala ortasyndaǵy zańsyz úı qurylysy úshin jaýap bergen qyzmetkerlerdiń jaýabyna qanaǵattanbady, dep habarlaıdy QazAqparat tilshisi.
Qala basshysymen kezdesý barysynda Bostandyq aýdany Sátpaev, 18d mekenjaıynyń turǵyny «Keremet» turǵyn úı kesheniniń zańsyz qurylysy týraly shaǵym aıtty.
«Úıimizdiń aldynda kúzden beri Rams kompanııasy úı salyp jatyr. Bul kompanııanyń qurylys júrgizýge ruqsat qujaty joq. Biz memlekettik sáýlet-qurylys baqylaý basqarmasyna, prokýratýraǵa shaǵymdandyq. Osy ýaqytqa deıin naqty jaýap joq. MSQB jospardan tys tekserý júrgizemiz dep ýáde berdi. Biraq qurylys áli júrip jatyr. Bul úıdiń shuńqyrynyń bıiktigi - 9 metrden kem. Bul bizdiń úıge qaýip tóndiredi», - dedi ol.
Alańdaǵan turǵyn 9 qabatty úı 4 qabatty úıden 10-aq metr qashyqtyqta ornalasqany qaı reglamentke saı ekenin surady.
«Iá, kompanııanyń qurylys júrgizýge eshqandaı ruqsat qujaty bolmaǵan. Qurylys kompanııasyna 1 mln teńgeden asa aıyppul salynady. Qurylys jumystary keshe toqtatyldy»,- dedi basqarma basshysy Baqytjan Naýryzbekov.
«Sonda olar qurylysty qalaı bastaǵan?»,- dep surady ákim basqarma basshysynan.
«Ol jerde munyń aldynda shuńqyr qazylǵan. Kompanııa kezinde jerdi bank arqyly satyp alǵan. Qazir shara qabyldap jatyrmyz»,- dedi basqarma basshysy.
Qalalyq josparlaý jáne ýrbanıstıka basqarmasynyń basshysy Almashan Ahmedjanov «Keremet» turǵyn úı kesheni Seıfýllın kóshesinde ornalasqanyn aıtty.
«Bul shuńqyr 10 jyl buryn parkıng qurylysy úshin salynǵan. Kompanııa turǵyn úı salýǵa ruqsat almaǵan. Osyǵan baılanysty MSQB ınspektorlary bul nysanǵa KamAZ ótýine tyıym saldy. Bul nysan qurylysy bas josparǵa saı bastalǵan. Jobany kelisý kezinde qurylys normalaryna saı erejeler saqtalady. Apattyq ahýaldy boldyrmas úshin shuńqyr toltyrylady. Bul nysan baqylaýǵa alyndy»,- dedi Almashan Ahmedjanov.
«Jaýap durys emes», - dedi Baqytjan Saǵyntaev.
«Biz qurylys normalary men erejelerine sáıkes qaı qashyqtyqta turǵyn úı salýǵa bolatynyn bilgimiz keldi. Almatynyń damý josparyna sáıkes bul jerde garajdan bıik nysan salynbaýy tıis»,- dedi turǵyn.
«Almashan, Baqytjan, sizder durys jaýap bermeı otyrsyzdar. Rams kompanııasynyń qurylys júrgizýge ruqsaty bolmasa, qandaı aıyppul týraly aıtyp otyrsyzdar? Sizder zańsyz qurylysqa aıyppul salasyzdar. ıAǵnı, qurylys salynady degen sóz be? Eger avtoturaqtyń ornyna úı salyp jatsa, súrý kerek. Jaýap osylaı bolýy kerek. Ony qalaı zańdastyrmaqsyzdar? Turǵyndar qarsy. Osyny qolǵa alyńyzdar»,- dedi Baqytjan Saǵyntaev.
