Almaty ákimi úzdik ustazdarmen kezdesti
Qala basshysy prezıdent Nursultan Nazarbaevtyń tapsyrmasymen daıyndalǵan «Pedagogtar mártebesi týraly» jáne «Oqýshy men oqytýshylardyń júktemesin azaıtý týraly zań normalaryna ózgerister men tolyqtyrýlar engizý týraly» zań jobalary jaıly sóz qozǵady.
«Joldaý arqyly qazaqstandyq pedagogtar Memleket basshysynyń muǵalimderdiń eńbegin qanshalyqty joǵary baǵalaıtynyn túsindi. Sizderdiń bilim berý salasyndaǵy eren eńbekterińizdi eskere otyryp, úlken rahmet aıtqym keledi. Sizderdiń kásibı biliktilikterińizdiń dáleli retinde oqýshylaryńyzdyń jetistigin aıtýǵa bolady», - dedi Baýyrjan Baıbek.
Qala basshysy bıyl jaqsy jetistikterge jetken ustazdardy merekege oraı marapattady.
Aıta keteıik, jyl basynan beri Almatyda oqytýdyń jańa mazmunyna kóshken ustazdardyń jalaqysy 30%-ǵa artty. Bul Almatydaǵy muǵalimderdiń 70% desek bolady. 1 qyrkúıekten bastap ulttyq biliktilik testileýinen ótken 1293 muǵalimniń laýazymdyq jalaqysyna 30-50% ústeme qosyldy.
Sondaı-aq, memleket aǵylshyn tilinde sabaq beretin muǵalimderge barynsha qoldaý kórsetip keledi. Osymen ekinshi jyl qatarynan hımııa, bıologııa, ınformatıka pánderin aǵylshyn tilinde júrgizetin muǵalimderdiń laýazymdyq jalaqysyna 200% ústeme qosyldy.
Aıta keteıik, qalada táýelsizdik jyldarynda memleket basshysynyń kómegimen 117 bilim berý nysany ashyldy. Sońǵy 5 jylda bilim berý salasyn qarjylandyrý 37%-ǵa artyp, 27 mlrd teńgege jetti.
Sonymen qatar, qala ákimdigi bilim salasynyń ınfraqurylymyn damytýǵa mán berip otyr. Tek bıyldyń ózinde mektepterdi kúrdeli jóndeýge 17 mlrd teńge bólindi.
