Almaty ákimi úzdik túlekterge «Altyn belgi» jáne granttar tabys etti
ALMATY. 21 maýsym. QazAqparat - Keshe keshkisin almatylyq oqýshylar mektepterimen qoshtasty. Balýan Sholaq atyndaǵy Sport saraıynda 20-ynshy «Jas túlek» festıvali ótti.
Oǵan Almaty qalasynyń 3 myńǵa jýyq úzdik mektep bitirýshileri qatysty. Almaty ákimi Ahmetjan Esimov bıylǵy mektep bitirýshilerdi Qazaqstan Respýblıkasy táýelsizdiginiń 20 jyldyǵyna tuspa-tus kelip otyrǵan ómirlerindegi erekshe oqıǵamen quttyqtap, olarǵa aq jol tiledi.
«Memleket basshysy Nursultan Ábishuly Nazarbaev jastardy bilimdi, jigerli, batyl jáne Qazaqstannyń naǵyz patrıoty bolýǵa únemi shaqyrady. Bul qasıet senderge óte qajet, senderdiń ata-analaryń osyny arman etken, al ustazdaryń osynaý izgi qasıetterdi senderdiń boılaryńa sińirý úshin aıanbaı eńbek etip, kúsh- jigerlerin jumsady», - dedi Ahmetjan Esimov.
Almaty ákimi mektep túlekterine sertıfıkattar men «Altyn belgi» medaldaryn, Almatynyń 15 joǵary oqý ornynda bilimderin jalǵastyrý úshin 15 túlekke granttardy tabys etti. 2011 jyly 8042 túlek mektep bitirdi, olardy 148-i alǵan bilimderin dáleldep, attestatqa qosa «Altyn belgi» medaldaryn, 115 túlek úzdik attestattaryn aldy. Respýblıkalyq ǵylymı saıystarǵa, olımpıadalarǵa 159 oqýshy qatysty, oldardyń 98-i júldeger atandy. Almatynyń 91 oqýshysy - halyqaralyq jarystar men olımpıada jeńimpazdary.
Almaty komandasy 6 jyl qatarynan respýblıkalyq olımpıadada birinshi oryndy ıelenip keledi. 149 oqýshy «Úrker» qurmet belgisimen marapattalǵan. 15 oqýshyǵa Almaty qalasy bıýdjetinen joǵary oqý ornynda bilimderin jalǵastyrý úshin ákimniń granty berildi. Bul grantty alýshylar - jetimder, tolyq emes otbasynyń balalary, múgedekter.
