Almaty ákimi Úndistan elshisimen kezdesti
ALMATY. QazAqparat - Almaty qalasynyń ákimi Baýyrjan Baıbek Úndistannyń Qazaqstandaǵy Tótenshe jáne ókiletti elshisi Prabhat Kýmarmen kezdesti. Taraptar eki el arasyndaǵy saýda-ekonomıkalyq jáne mádenı-gýmanıtarlyq baǵyttaǵy máselelerdi nyǵaıtý jaıyn talqyǵa saldy, dep habarlaıdy «QazAqparat» HAA.
Baýyrjan Baıbek nátıjeli bolǵan yntymaqtastyq jyldarynda Qazaqstan Úndistan úshin Ortalyq Azııa elderi arasynda iri saýda jáne ınvestıtsııalyq áripteske aınalǵandyǵyn atap ótti. Úndistan IT-qyzmetter salasyndaǵy iri eksporterlardyń biri. Almaty bolsa, ınvestıtsııalyq habtardy damytý tájirıbesin zerdeleýge jáne úndistandyq tehnoparktermen yntymaqtastyq ornatýǵa daıyn. Óz kezeginde Úndistan elshisi týrızm, mádenıet jáne bilim salasyndaǵy yntymaqtastyqtyń áleýeti týraly aıtty.
«Almaty úndistandyq bıznes pen mádenıet salasy ókilderiniń de qatysýymen kóptegen jáne túrli sharalar uıymdastyrlyp jatatyn iri ortalyqtardyń biri. Bul qalaǵa Delıden nebári 3,5 saǵatta ushyp kelýge bolady. Sol sebepti ol bizdiń azamattarymyz úshin tanymal týrıstik baǵytqa da aınalyp otyr. Biz túrli festıvaldar men kontsertter jáne kórmeler uıymdastyra otyryp, odan ári de mádenı baılanystardy arttyra bergendi jón kórip otyrmyz. Megapolıste Úndistannan 600-ge jýyq stýdentter bar. Menińshe, ekijaqty bilim berý baǵdarlamalarynyń spektri aldaǵy ýaqytta tek arta beretin bolady»,-dedi Prabhat Kýmar.
Búgingi tańda Almatyda saýda, medıtsına, qurylys, qarjy salalary boıynsha Úndistan kapıtalynyń qatysýymen 152 kásiporyn jumys istep jatqandyǵyn aıty ketý kerek. 2017 jyl boıyna Almaty qalasy men Úndistan arasyndaǵy taýar aınalymy 186,6 mln AQSh dollaryn qurady.
