Almaty ákimi UEFA kýbogynyń ıegerlerimen kezdesti
ALMATY. QazAqparat - Búgin Almaty ákimi Ahmetjan Esimov 2 márte UEFA kýbogyn ıemdengen fýtzaldan Qazaqstannyń «Qaırat» komandasynyń oıynshylarymen kezdesti.
Qala ákimi komanda oıynshylaryn eýropalyq týrnırdegi jeńisimen quttyqtap, oıynnan alǵan óz áserimen bólisti.
«Men matchty basynan aıaǵyna deıin teledıdar arqyly tamashaladym. Oıyn óte shıeleniske toly boldy. Igıtaǵa kóp rahmet. Bizdiń qaqpashymyz qaqpamyzdy qorǵaı bildi. Barlyq oıynshy óte qyzyq oıyn kórsetti. Bári de jeńiske laıyq. Fınalda Barselonany tize búktirý ońaı emes», - dedi qala basshysy.
Óz kezeginde sportshylar dúbirli dodadaǵy jeńisin týǵan eli men Memleket basshysyna arnaıtynyn jetkizdi. «Men sizdi qala ákimi laýazymyna taǵaıyndalǵanyńyzben quttyqtaǵym keledi. Men Qazaqstannyń azamattyǵyn aldym. Endi ulttyq quramanyń namysyn qorǵaıtyn bolamyn. Men úshin bul úlken mártebe», - dedi «Qaırat» klýbynyń qaqpashysy Igıta. Kezdesý sońynda sportshylar Lıssabonnan ákelingen UEFA kýbogy men týrnırdiń altyn medalin Ahmetjan Esimovke kórsetti. Qala basshysy oıynshylarǵa ákimniń kýbogy men 5 mln teńgege baǵalanǵan sertıfıkat berdi. Aıta keteıik, almatylyq «Qaırat» mını-fýtboldan 2 márte UEFA kýbogyn ıelendi. Sońǵy saıys sáýirdiń 26-sy kúni Lıssabonda ótken bolatyn. «Qaırat» komandasy ıspanııalyq «Barselonany» 3:2 esebimen tize búktirip, týrnırdiń jeńimpazy atandy.
