Almaty ákimi UBT-dan 125 ball jınaǵan eki túlekti quttyqtady
ALMATY. QazAqparat - Búgin Almaty ákimi Ahmetjan Esimov UBT-dan 125 bal jınaǵan almatylyq «Altyn belgi» ıeleri №178 lıtseıdiń túlegi Áddijappar Aıǵanym men №159 gımnazııanyń túlegi Ásııa Maratty qabyldady.
Qala basshysy túlekterdi joǵary jetistigimen quttyqtap, oqýda sáttilik tiledi. Ol Almatyda sapaly bilim alýǵa barlyq jaǵdaı jasalǵandyǵyn atap ótti.
«Sońǵy úsh jylda bilim berý salasyn qarjylandyrý 2 ese artty. Eger, 2008 jyly 22,2 mlrd teńge bólinse, bıyl 46,9 mlrd teńge qarastyrylyp otyr. Osy ýaqyt aralyǵynda 14 jańa mektep salyndy. Barlyq oqý nysandary zamanaýı tehnıkamen jabdyqtalǵan. Qalada myńdaǵan úzdik ustazdarǵa arnaıy syıaqy bólinýde», - dedi A.Esimov.
Esterińizge sala keteıik, Almaty túlekteri osymen úshinshi jyl qatarynan kóshbasshylyqty saqtap qaldy. Bıyl Almatyda «Altyn belgige» úmitker 229 oqýshynyń 173-si (75,5%) ózderiniń úzdik bilimderin dáleldedi. Olardyń ishinde 21 túlekke «Altyn belgige» 1 ball jetpeı qaldy. 5 oqýshy 124 baldan jınaqtady. Al eń úzdik nátıjeni №90 lıtseıdiń túlekteri kórsetti. Qalalyq Bilim berý basqarmasynyń basshysy Rahat Shımashevanyń aıtýynsha, 50-den tómen ball jınaqtaǵan mektep bitirýshilerdiń sany bıyl 5,1 paıyzǵa azaıǵan. Al 1831 (37,4%) oqýshy 100-den joǵary ball aldy. Bul byltyrǵy jylmen salystyrǵanda 14,1 paıyzǵa kóp. UBT qorytyndysyna sáıkes, ortasha ball boıynsha Alataý (97,3 ball), Medeý (96,4 ball), Almaly aýdandary kósh bastap tur (96,3 ball).
