Almaty ákimi tamaq jetkizetin kompanııalarǵa jol erejesin saqtaýdy eskertti
ALMATY. QazAqparat – Almaty polıtsııasy skýter, moped, velosıped, samokat mingen azamattarmen profılaktıkalyq jumystar júrgizedi. Bul týraly Baqytjan Saǵyntaev Akimat Live telebaǵdarlamasynyń tikeleı efırinde málim etti, dep habarlaıdy QazAqparat tilshisi.
Onyń aıtýynsha, pandemııa bastalǵaly Almaty joldarynda moped pen skýterlerdiń sany artqan.
«Byltyr elde tótenshe jaǵdaı rejımi jarııalanyp, Almaty jabylǵan kezde qalada kýrerlik qyzmet kórsetetin, ıaǵnı azyq-túlik pen basqa da taýar túrlerin jetkizetin mopedter men skýterlerdiń sany kún saıyn artty. Taǵy bir baıqaǵanymyz, osy atalǵan kólikterdiń júrgizýshileri shlem kımeıdi eken», - dedi ákim.
Sonymen qatar, Almatyda skýter, moped sııaqty transporttardyń qatysýymen bolatyn jol apattary kóbeıdi.
«Biz Polıtsııa departamentimen birigip, bul máseleni nazarǵa aldyq. Nátıjesinde, saǵatyna 100 shaqyrymǵa deıin júretin júrdek skýterler men mopedter bar ekeni belgili boldy. Olar tirkeýge alynbaǵan jáne ony tizgindegender kólik júrgizý quqyǵynsyz júrgen. Olar eshqandaı erejelerdi saqtamaıdy. Jaqyn arada biz jol polıtsııasymen jumys isteı bastaımyz»,- deıdi Baqytjan Saǵyntaev.
Sonymen qatar ákim erejege sáıkes, eger mopedtiń qozǵaltqysh kólemi 50 tekshe metrden assa, onda ol kólik retinde polıtsııada tirkelýi kerek jáne júrgizýshiniń tıisti sanattaǵy kýáligi bolýy shart ekenin atap ótti.
Bul talaptar oryndalmaǵan jaǵdaıda, júrgizýshige ákimshilik hattama toltyrylyp, atalǵan kólik quraldary aıyppul turaǵyna qoıylady.
«Jol polıtsııasymen birge reıdter dúısenbide bastalady. Azyq-túlik jáne tamaq jetkizýmen aınalysatyn barlyq kompanııalarǵa aldyn ala eskertý jasaldy. Bul bıznes ekeni anyq, suranys bar ekeni túsinikti, biraq erejeler saqtalýy tıis»,- dep qosty Baqytjan Saǵyntaev.
