Almaty ákimi soǵys ardagerlerin Jeńis kúni merekesimen quttyqtady
16 jasynda soǵysqa attanǵan Bısenǵalı Jubanııazovtyń úıine barǵan Erbolat Dosaev ardagerdiń ómir joly erliktiń, órliktiń jáne áskerı boryshqa adaldyqtyń jarqyn úlgisi ekenin atap ótti.
«Sizdi kórgenime óte qýanyshtymyn! Byltyr Jeńis kúnin toılaý kezinde aıtqan sózińiz, aqylyńyz, jyly tilegińiz áli esimde. Taǵy bir jyl ótti, sizdi osy mereıli merekede denińiz saý, tatý-tátti otbasynyń arasynda jaqsy kóńil-kúıde otyrǵanyńyzdy kórý – úlken baqyt. Menińshe, balalaryńyz ben nemerelerińiz baqytty jandar. Óıtkeni, bolashaǵymyz úshin talaı ıgi is tyndyrǵan aqsaqal, áýlet basshysynan bata alyp otyr. Eki jyldan soń sizdiń mereıtoıyńyz bolady, ıaǵnı sizdiń 100 jyldyǵyńyzda taǵy kezdesip, toılaýdy jazsyn», - dedi qala ákimi.
Almaty basshysy, sondaı-aq Vladımır Belozerov pen jubaıy Tamara Ivanovnany merekemen quttyqtady.
«Biz sizdiń aldyńyzda qaryzdarmyz, qonaqjaılyq, jyly qarym-qatynas, energııańyz jáne ómirge degen súıispenshiligińiz úshin alǵys aıtamyn. Munyń bári mahabbattan bastalady. Jubaıyńyz ekeýińiz bizge úlgisizder. Men sizdiń ómirińizde bári jaqsy bolǵanyn qalaımyn. Qoldaryńyz ajyramasyn, baqytty bolyńyz. Biz óz kezeginde qalamyzdyń gúldenýi úshin bar kúshimizdi salamyz», - dedi qala ákimi.
Soǵys ardageri Zulharnaı Seıitov maıdan jáne beıbit ómirden alǵan estelikterin Erbolat Dosaevpen qýana bólisti. Óz kezeginde ákim Zulharnaı Seıitovti kele jatqan uly merekemen quttyqtady.
«Adamzat tarıhyndaǵy eń qıyn da, qatygez soǵysta sizder, ákelerimiz ben atalarymyz naǵyz batyrlyq kórsetip, Uly Jeńiske úles qostyńyzdar. Siz búkil ǵasyrdyń kýágerisiz. Biz sizderge ashyq aspan men beıbit ómir úshin alǵys aıtamyz. Bul eń aldymen, sizderdiń eńbekterińiz. Biz úshin 9 mamyr – Uly mereke. Jas urpaq sizdiń erligińizdi umytpaıdy», - dedi Erbolat Dosaev ardagermen jáne onyń otbasy múshelerimen áńgime barysynda.
