Almaty ákimi Reseıden kelgen dárigerler qandaı kómek kórsetetinin aıtty
«Baýyrlas qalalardyń yntymaqtastyǵy týraly kelisimshart sheńberinde Máskeýden Almatyǵa COVID-19 kúreske kómek kórsetý úshin bir top maman keldi. Onyń quramynda densaýlyq saqtaý salasynyń uıymdastyrýshylary, ınfektsıonıster, epıdemıologtar, anestezıologtar, revmatologtar men pýlmonologtar bar»,– dep jazdy Baqytjan Saǵyntaev.
Mamandardyń bir toby ınfektsııalyq statsıonarlardyń jumysyn, aýyr naýqastardyń emdelý hattamalaryn jáne patsıentterdi ornalastyrý jumystaryn baǵalaıdy. Qalǵan top qoǵamdyq densaýlyq basqarmasynyń uıymdastyrý máselelerin, barlyq deńgeıdegi KVI-den emdelýshilerge medıtsınalyq qyzmettiń kórsetilý deńgeıine mán bermek.
«Al zerthanalyq zertteýler júrgizý, jańa statsıonarlardy uıymdastyrý jáne ottegi gazdarymen emdeý máseleleri jeke pysyqtalady. Sondaı-aq Mossanepıdqadaǵalaýdyń epıdemıologtary almatylyq áriptesterimen pikir almasyp, keńes beredi»,– dep atap ótti ákim.
Buǵan deıin Reseıden bir top dárigerdiń Qazaqstanǵa kelgenin habarlaǵan bolatynbyz.
