Almaty ákimi prezıdenttiń «Múlik ıeleri birlestigi týraly reformamyz qate boldy» degen sózin túsindirdi

ALMATY. QazAqparat - Almaty ákimi Erbolat Dosaev Bostandyq aýdany turǵyndarymen kezdesýinde prezıdenttiń «Múlik ıeleriniń birlestigi — qatelik» degen sózin túsindirip berdi, dep habarlaıdy QazAqparat tilshisi.

Bostandyq aýdany turǵyndarynyń biri Erbolat Dosaevtan «Keshe «Memleket basshysy aıtqan Múlik ıeleri birlestigi týraly reformamyz — qatelik» degeni MIB nemese QS qurý toqtatylady degendi bildire me?» dep surady.
Erbolat Dosaevtyń sózinshe, prezıdent Qazaqstandaǵy turǵyn úıdi basqarý reformasynyń qateligi týraly aıtqanda Múlik ıeleriniń birlestigi (MIB) nemese Qarapaıym seriktestik (QS) qurýdy toqtatýdy meńzegen joq.
«Qatelik jiberdik» - biz báriniń jaqsy bolǵanyn qalaımyz degen kózqaras turǵysynan aıtyldy. MIB pen QS qurýǵa qatysty olqylyqtar bar. Qala ákimi retinde men de Memleket basshysyna oıymdy aıttym. Negizi, biz bul kezeńnen óttik. Almatydaǵy úılerdiń 90%-dan astamy turǵyn úıdi basqarýdyń jańa nysandaryn qurdy. Másele, búgingi kúni zańda basshylyq etetinderdiń jaýapkershiligi belgilenbegen», - dedi Erbolat Dosaev.Ol jańa Múlik ıeleri birlestigi men Qarapaıym seriktestik ınstıtýtynyń jumys isteýi úshin qajetti zańnamalyq ózgerister 1 shildege deıin bekitiletinine senim bildirdi.
Eske salaıyq, keshe Memleket basshysy Qasym-Jomart Toqaev elimizdiń áleýmettik-ekonomıkalyq damýy jónindegi keńeste Múlik ıeleri birlestigi reformasynda qatty qatelikke urynǵan sııaqtymyz degen edi.