Almaty ákimi polıtsııa mobıldi pýnktteriniń jumysyn tekserdi
ALMATY. QazAqparat – Almaty ákimi Baqytjan Saǵyntaev polıtsııa mobıldi pýnktteriniń ınspektorlary keshki ýaqytta kezekshilikti qalaı atqaratynyn tekserdi, dep habarlaıdy QazAqparat tilshisi.
Ákim Saıahat, Kók bazar, Gandı saıabaǵy, Atakent, Panfılovtegi jaıaý júrginshiler jolynda ornalasqan mobıldi pýnkt ınspektorlarynyń keshki ýaqyttaǵy kezekshiligin tekserdi.
«Qala turǵyndarynyń pikirinshe, ásirese qazirgideı qarańǵy erte túsken shaqta munyń mańyzy zor. Mobıldi pýnktterdi ornalastyrý qandaı da bir aımaqtyń krımınogendik jaǵdaıyna taldaý jasaý arqyly júzege aspaq. Adamdar kóp jınalatyn jerge polıtsııanyń mobıldi pýnktterin ornalastyrý — qoǵamdyq qaýipsizdikti qamtamasyz etýdiń taǵy bir pármendi sharasy. Ázirge mundaı 22 beket qoıylsa, jyl sońyna deıin taǵy 10 beket salynady», - dep jazdy ákim Instagram paraqshasyna.
Ol qala turǵyndarynyń ýchaskelik ınspektorlardyń jumysyna qolaıly jaǵdaı jasalǵanyn baıqap úlgergenin aıtty. Taza ári ashyq etip jasalǵan pýnktter jylý jáne sanıtarlyq júıemen qamtamasyz etilgen.
«Qaýipsiz qala — meniń jeke baqylaýyma alynǵan basty basymdyqtardyń biri. Qala turǵyndary ózderin qaýipsiz sezinýi kerek», - dep atap ótti ákim.
