Almaty ákimi Ortalyq stadıonǵa jaqyn ornalasqan aımaqty dereý retke keltirýdi tapsyrdy
ALMTY. QazAqparat - Almaty ákimi Baýyrjan Baıbek jumys saparymen Bostandyq aýdanyn aralady.
Shahar basshysy Ortalyq stadıonǵa jaqyn ornalasqan aımaqtyń abattandyrylýyna kóńili tolmaıtyndyǵyn jetkizdi.
Injenerlik jelilerdi sapasyz júrgizý saldarynan Ortalyq stadıon aldyndaǵy asfalt jaryla bastaǵan. Óz isine jaýapsyz qaraǵan merdigerlik uıym endi eki-úsh kún ishinde olqylyqtardyń ornyn toltyrýy tıis.
Jaıaý júrginshilerdiń stadıon aımaǵyna ótýi yńǵaıly bolý úshin usqynsyz qorshaýlar men jónsiz qoıylǵan avtokólikter alynyp tastalady, olardyń ornyna gúlzar, jasyl jelek otyrǵyzylyp, qoqys jáshikteri qoıylady.
Almaty ákimi Ortalyq stadıon aınalasyndaǵy kútimsiz qalǵan jerlerdiń qalaı berilgendigin zań júzinde tekserýdi tapsyrdy.
Ortalyq stadıonnyń apatty jaǵdaıdaǵy maneji men zapastaǵy alańyna kúrdeli jóndeý jumystaryn júrgizý josparlanǵan.
