Almaty ákimi Oqýshylar saraıy mańyndaǵy aǵashty kesýge tyıym saldy
ALMATY. QazAqparat - Almaty ákimi «Ońtústik» saıabaǵy men Oqýshylar saraıy aldyndaǵy skverdi qaıta jasaý jónindegi jobaǵa túzetýler engizýdi tapsyrdy, dep habarlaıdy QazAqparat tilshisi.
Búgin ákim qaıta jasaýǵa qatysty daıyndyqtar júrip jatqan «Ońtústik» saıabaǵy men Oqýshylar saraıynyń mańyndaǵy saıabaqty aralap kórdi.
«Ońtústik» saıabaǵy Jarokov kóshesiniń shyǵysy men Hodjanov kóshesiniń soltústigine qaraı 14,2 gektar aýmaqty alyp jatyr.
Qalalyq Tabıǵı resýrstar jáne tabıǵatty paıdalanýdy retteý basqarmasynyń basshysy Áset Masabaev joba boıynsha jaryq kózderin jańartý, fontandar jasaý, oryndyqtar men ýrnalar qoıý, burynnan bar aryqtardy jańartý, balalar men sport alańdaryn, velojoldar jasaý qarastyrylǵanyn aıtty.
Alaıda, megapolıs ákimi zamanaýı tendentsııalar men turǵyndardyń talaptaryna saı qolda bar jobaǵa túzetýler engizý qajettigin eskertti.
«Munda halyqtyń barlyq toptaryna - sábıin kótergen anaǵa, balalarǵa, tynyshtyqty qalaıtyn eresek jandarǵa demalý jaıly bolýy tıis. Bul kóńil kóteretin emes, durys demalatyn oryn, sondyqtan asfaltty alańdy qysqartyp, burynnan bar tóte jáne jińishke joldardy qaıta jasyldandyryp, barynsha qolaıly ári kóleńkeli keńistik jasaǵan jón jáne úlken sáýlet pishindegilerdiń ornyna shaǵyn lokaldi jaryq kózderin ornatý qajet. Sý ishetin fontandar, ájethanalar, eń bastysy ıtterdi serýendetetin arnaıy qorshalǵan alań bolýy mindetti», - dedi Baýyrjan Baıbek.
Almaty ákimi qaıta jasaýdyń basty qaǵıdasy burynnan bar jasyl jelekti saqtaýmen qatar jańasyn qalyptastyrý ekenin aıtty.
Joǵaryda aıtylǵan barlyq usynystardy eskere otyryp, jobaǵa tıisti túzetýler engizý tapsyryldy. Jalpy, budan bylaı saıabaq aýmaǵynda qoǵamdyq qaýipsizdikti qamtamasyz etýge erekshe nazar aýdarylatyn bolady.
Jumys sapary barysynda Baýyrjan Baıbek Medeý aýdanyndaǵy Oqýshylar saraıynda da boldy. Almaty ákimi jasyl jelekke tıispeýdi tapsyrdy. Skverdi jańǵyrtý barysynda sýarý júıesin jańartý, kóshe jaryǵy baǵanalaryn jóndeý jáne basqa da sharalardy júzege asyrý mindetteldi.
Aıta ketý kerek, qalalyq Tabıǵı resýrstar jáne tabıǵat paıdalanýdy retteý basqarmasynyń jobasy turǵyndardyń narazylyǵyn týdyrǵan edi.
Qujatta 300-den astam taldy kesý qarastyrylǵan bolatyn.
