Almaty ákimi Naýryzbaı aýdanyndaǵy áleýmettik nysandardyń qurylysyn tekserdi
ALMATY. QazAqparat - Almaty ákimi Baýyrjan Baıbek Naýryzbaı aýdanyndaǵy áleýmettik mańyzy bar nysandardyń qurylys barysyn tekserdi, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasaı otyryp.
Almaty ákimi Baýyrjan Baıbek Naýryzbaı aýdanyn damytý boıynsha ótkizgen kóshpeli jıyn barysynda jaqynda qurylysy aıaqtalatyn jańa ákimshilik ortalyq, 1 200 oryndyq mektep, kúnine 500 jáne 200 adam qabyldaıtyn eki emhana qurylysynyń jumystaryn kórdi. 
Naýryzbaı aýdanynyń ákimi Saıran Saıfedenov bıyl Qalqaman yqsham aýdanynda jańa joldar salý josparlanǵanyn aıtty.
Aýdan ákiminiń aıtýynsha, uzyndyǵy 17 shaqyrym bolatyn 32 kóshe jańartylady jáne uzyndyǵy 26 shaqyrymdy quraıtyn 22 kóshege ortasha jóndeý jumystary júrgiziledi.
«Budan ózge, Jandosov kóshesi kúrdeli jóndeýden ótedi, Saıyn kóshesiniń qıylysynan Taýsamaly poselkesine deıin jalpy uzyndyǵy 2,08 shaqyrymdyq jol salynady. Jóndeý jumystary barysynda jol tórt jolaqqa deıin keńeıedi, Qarǵaly ózeniniń boıyndaǵy kópir qaıta jasalady, velojoldar men trotýarlar salynady», - dedi ol. 
Saıran Saıfedenov Baýyrjan Baıbekke kóshelerdi kúrdeli jóndeýden ótkizý jumystaryn merziminen buryn, qyrkúıek aıynda aıaqtaý josparlanǵanyn aıtty.
Qala ákimi Aqjar yqsham aýdanyndaǵy iske qosylmaǵan «Edelveıs» bala baqshasynda boldy. Nysannyń jalpy aýmaǵy - 1 805 sharshy metr. 2007-2017 jyldary Memlekettik múlik jáne jekeshelendirý komıteti bala baqshany «Tsentr Vıd» JShS-ne basqarýǵa bergen. Alaıda, balabaqsha kúni búginge deıin bos tur. Qala basshysy bul balabaqshany ashý úshin tıisti sharalar qabyldaýdy tapsyrdy.
Aıta keteıik, Naýryzbaı aýdanynda 3 jastan 6 jastaǵy 668 balaǵa mektep jasyna deıingi balalar mekemelerinde oryn jetispeıdi, al 1 jastan 6 jasqa deıingi 1 419 baldyrǵan balabaqshaǵa zárý.
