Almaty ákimi nashaqorlar jınalatyn úıdi buzýdy tapsyrdy

ALMATY. QazAqparat - Almaty ákimi Erbolat Dosaev Medeý aýdany turǵyndarymen kezdesýi barysynda jaýapty adamdarǵa 2016 jyly buryn órtenip ketken úıdi buzýdy tapsyrdy, dep habarlaıdy QazAqparat tilshisi.

Erbolat Dosaevpen kezdesýge arnaıy kelgen Medeý aýdanynyń turǵyny osydan 6 jyl buryn órtenip, qańyrap bos turǵan úı máselesin kóterdi.
Onyń aıtýynsha, ol jer úı-kúısiz júrgenderdiń túnep, nashaqorlardyń jınalatyn orynǵa aınalǵan.
«Cherkasskaıa oborona, 13 mekenjaıyndaǵy úı 2016 jyldyń qazan aıynda órtenip ketti. Turǵyndardy basqa jaqqa kóshirdi. Al úı bolsa, qańyrap bos qaldy. Aýmaqtan birneshe ret máıit tabyldy jáne 12 ret órt shyqty. Men Sizden suraıtynym sol úıdi súrip tastańyzdarshy»,- dedi turǵyn.
Almaty ákimdiginiń Kúrdeli qurylys kásipornynyń ókili ınvestorlar izdestirilip jatqanyn aıtty.
Erbolat Dosaev, dereý nysandy buzýdy qolǵa alýdy tapsyrdy.
«Kúrdeli qurylys kásipornynyń esebinen ózderiń buzýlaryń kerek. Qarajat bar ǵoı? Buzyńdar, sosyn ınvestor izdeńder», - dedi qala ákimi.

Foto: shutterstock.com