Almaty ákimi múmkindigi shekteýli jandarǵa jaǵdaı jasaýdy tapsyrdy
ALMATY. QazAqparat - Baqytjan Saǵyntaev basqarma basshylaryna múmkindigi shekteýli jandarǵa barlyq jaǵdaıdy jasaýdy tapsyrdy, dep habarlaıdy QazAqparat tilshisi Almaty ákiminiń Facebook paraqshasyna silteme jasap.
Almaty ákimi Baqytjan Saǵyntaev múmkindigi shekteýli jandarmen ótkizgen jıynda birneshe máseleni kóterdi.
«Olar úshin kópqabatty ǵımarattardyń, pandýstar men tabaldyryqtardyń, ásirese barlyq memlekettik jáne medıtsınalyq mekemelerde, HQO–larda qoljetimdi bolýyna nemketti qaramaǵan jón. Qoǵamdyq densaýlyq jáne bilim basqarmalary jeke mekemelermen jumys isteýleri tıis. Bular mańyzdy jumystar. Saıfedenov, Tósekbaev, Qojabergenova, Telibaev tekserýlermen tolyq aýdıt júrgizetin bolady», - dedi qala ákimi.
Qoǵamdyq kólikter men baǵdarshamdarǵa arnaıy dybystyq qondyrǵylar ornatylýy tıis. Bul zaǵıp jáne kózi nashar kóretin jandar úshin qajet.
«Zaǵıptar men nashar kóretinder úshin aıaldamalardy habarlaıtyn daýystyq optsııamen avtobýstardyń nebári 55%-y qamtylǵan. Qozǵalys kezinde olardy umyt qaldyrýǵa bolmaıdy. Kólikke otyrý jáne túsý kezinde kómek kórsetken jón. Zaǵıptar úshin qaýipti burylystardaǵy baǵdarshamdarǵa dybystyq belgi ornatylýy tıis. Metronyń jańa beketterin salý barysynda múgedekterge qajet qoljetimdiliktiń barlyq talaptary saqtalatyn bolsyn», - deıdi Baqytjan Saǵyntaev
Bul — Áýkenovke jáne qalalyq mobıldik basqarmasyna berilgen tapsyrma.
«2019 jyly múgedek jandardyń 60%-y reabılıtatsııamen jáne áleýmettik qyzmettermen qamtylǵan. Úkimettik emes uıymdar eresek múgedekter úshin kópfýnktsıonaldy reabılıtatsııalyq ortalyq ashýdy usyndy. Úlken másele ári qarjyǵa qatysty. Másele birden sheshilmeıdi, utymdy joldaryn izdestiremiz. Bul isti orynbasarlarym Óserov pen Áýkenovke tapsyramyn», - dedi ol.
Múmkindigi shekteýli mektep jasyndaǵy balalardy ınklıýzıvti bilimmen qamtý josparda.
«Almatyda 9 myń bala erekshe bilim berýdi qajet etedi. Olardy qalanyń mektepterine bólip, ınklıýzıvti bilim berýge tartqan jón», - dep jazdy Baqytjan Saǵyntaev.
Múmkindigi shekteýli jandar úshin jumys oryndaryn ashý jalǵasa bermek. Zańnamaǵa sáıkes, barlyq kásiporyndar 2% - 4%-ǵa kvota berýleri tıis.
«Ókinishke qaraı, zań talaptary oryndalmaıdy. Kvota boıynsha jumyspen qamtý deńgeıi tómen. Eńbekpen qamtý ortalyqtary, kásipkerlik basqarmasy salanyń ÚEU jáne kásipodaqpen birge osy baǵytta júıeli jumystardy júzege asyrýlary qajet»,- delingen jazbada.
Búgingi kúni Almaty qalasynda 43200 múgedek jan turady.
