Almaty ákimi Muqaǵalı Maqataev atyndaǵy mektep oqýshylaryn Bilim kúnimen quttyqtady
MATY. 1 qyrkúıek. QazAqparat /Erbol Azanbek/ - Búgin Almatynyń barlyq mektepterde qońyraý qaǵylyp, Bilim kúnin atap ótti. № 140 mektep ujymyn qala ákimi Ahmetjan Esimovtiń ózi quttyqtady.
Muqaǵalı Maqataev esimin ıelengen mektepte búgin qos birdeı mereke. Biri búgingi bilim kúni bolsa, ekinshisi aqıyq aqyn Muqaǵalı Maqataevtyń 80 jyldyǵy. Qala ákimi qos birdeı merekemen quttyqtap, tabys tiledi. «90 jyldary Almatyda qazaq tildi 5-aq mektep bolsa, búginde sany 50-den asady. Onda 80 myńǵa jýyq oqýshy bilim alýda. Bolashaqta sany arta beretinine senimdimin. M.Maqataev atyndaǵy mektep sol qazaq tildi jetekshi bilim ordalarynyń biri. Jańa oqý jylynda mektep ujymy men oqýshylarǵa tabys tileımin»,- dedi qala ákimi.
Almatyda qazirgi kezde 181 memlekettik jalpy bilim beretin mektep bar, onda 160 myńnan astam oqýshy oqıdy.
