Almaty ákimi mektepterdiń jańa oqý jylyna daıyndyǵyn tekserdi
ALMATY. QazAqparat – Baqytjan Saǵyntaev seısmıkalyq kúsheıtý men jańa korpýstardyń qurylysy aıaqtalýy tıis mektepterdi tekserdi, dep habarlaıdy QazAqparat tilshisi.
Almaty ákimi Baqytjan Saǵyntaev I.V. Panfılov atyndaǵy №54 qazaqstandyq-reseılik mamandandyrylǵan mektep-lıtseıdiń ǵımaratyn seısmıkalyq kúsheıtý barysymen tanysty. Kúrdeli jóndeý kezinde 1938 jyly salynǵan ǵımarattyń tarıhı qasbeti qalpyna keltirilip, ashyq sport alańy jańartyldy.
Qala basshysy mekteptiń ýaqytynda paıdalanýǵa berilýin qamtamasyz etýdi tapsyrdy.
«Orbıta-1» shaǵynaýdanyndaǵy №60 mektep-gımnazııada 600 oryndy jańa ǵımarat salyndy. Bul osy mekteptegi oqýshy ornynyń tapshylyǵyn joıýǵa múmkindik berdi.
Budan ózge, mektep aýmaǵynda jańarǵan sport alańy salyndy. Sonymen, burynnan bar sport zaldy eskersek, endi jańarǵan mektepte eki sport zal men ashyq sport alańy paıda boldy.
Aıta keteıik, Almatydaǵy 207 jalpy bilim beretin mekteptiń barlyǵy sport zaldarmen 100% qamtamasyz etilgen. Sondaı-aq bıyl 33 mektep stadıonyn qaıta qalpyna keltirýge 1 mlrd teńge bólindi. Orta bilim berý júıesinde 110 myń balany qamtıtyn 3 721 sport sektsııasy jumys isteıdi.
Sonymen qatar, memlekettik-jekemenshik áriptestik jobasy aıasynda bilim berý mekemeleriniń 8 sport alańy qaıta jańǵyrtylyp jatyr. Buǵan deıin memleket-jekemenshik bıznes jobasy aıasynda eki mekteptiń sport alańy jańarǵan bolatyn.
Qala ákimi Baqytjan Saǵyntaev oqýshylar arasynda koronavırýs ınfektsııasynyń taralýyn boldyrmaý úshin mektepterdiń sanıtarlyq qaýipsizdigin qamtamasyz etýdi tapsyrdy.
Densaýlyq jaǵdaıyna baılanysty emdeletinderdi qospaǵanda, memlekettik bilim berý uıymdarynyń barlyq qyzmetkerleri 100% vaktsınalanǵan.
Dástúrli bilim berý formatyna kóshý úshin mektepterde, balabaqshalarda, ınternattarda koronavırýs ınfektsııasynyń taralýyn boldyrmaý sharalary júrgizilip jatyr.
Barlyq uıymdar jýǵysh jáne dezınfektsııalyq quraldarmen, sondaı-aq antıseptıktermen jabdyqtalǵan.
Sabaq barlyq sanıtarlyq-epıdemıologııalyq talaptardy saqtaı otyryp uıymdastyrylady, onyń ishinde termometrııa, vızýaldy tekserý, efır, kvarts boıynsha da.
Sonymen qatar, Baqytjan Saǵyntaev D. Qonaev kóshesi, 127 meken-jaıdaǵy 3 jasqa deıingi balalarǵa arnalǵan ońaltý ortalyǵynyń ǵımaratyn rekonstrýktsııalaý jobasymen tanysty.
Munda týa bitkennen bastap bir jasqa deıin týa bitken jáne tuqym qýalaıtyn aýrýlary bar balalar baqylanyp, ońaltýdan ótedi. Jobanyń basty maqsaty – balalar arasyndaǵy aýrýshańdyq pen múgedektikti tómendetý.
Qala ákimi Qonaev kóshesi, 122 meken-jaıyndaǵy ǵımaratty da qarap shyqty. Buryn munda qalalyq Áleýmettik ál-aýqat basqarmasy ornalasqan bolatyn, basqarma Áleýmettik qyzmetter úıine kóshken edi.
Endi nysan 18 jastan asqan múgedekterge arnalǵan kópsalaly ońaltý ortalyǵyna jáne aýtızmi bar balalarǵa qoldaý kórsetý ortalyǵyna aınalamaq.
