Almaty ákimi qurylys alańdarynda qaýipsizdik erejeleriniń saqtalýyn tekserýdi tapsyrdy
Almaty qalasynyń ákimi Baqytjan Saǵyntaev Facebook -taǵy paraqshasynda úsh jasar balanyń qaıǵyly qazasyna baılanysty kóńil aıtty.
«Búgin qaıǵyly oqıǵa boldy. 3 jasar balanyń ómiri úzildi. Jaqyndary men týystaryna kóńil aıtamyn. Polıtsııa jan-jaqty ári obektıvti tergeý júrgizedi. Jaıly qalalyq orta men qala qurylysyn baqylaý basqarmalaryna bul nysandaǵy merdigerler men qosalqy merdigerlerdiń qurylys normalary men erejelerin saqtaýyn tekserýdi tapsyrdym. Sondaı-aq, qalanyń barlyq qurylys kompanııalarynyń jumys kezinde qaýipsizdik tehnıkasyn qanshalyqty saqtaıtynyn tekserýdi tapsyrdym»,-dep jazdy Baqytjan Saǵyntaev.
Búgin Almatyda 28 panfılovshylar saıabaǵynda úsh jasar balany júk kótergish aýyr kólik basyp ketti.
Kishkentaı bala alǵan jaraqattarynan oqıǵa orynda kóz jumdy.