Almaty ákimi quqyq qorǵaý organdaryn polıtseıler mert bolǵan oqıǵadan sabaq alýǵa shaqyrdy
ALMATY. 1 tamyz. QazAqparat - Almaty ákimi Ahmetjan Esimov Almatynyń quqyq qorǵaý organdary basshylarynyń qatysýymen jedel jıyn ótkizdi.
Jıyndy ashqan qala basshysy ІІD-niń basshylyǵyna 28 shilde kúni qarýly qaqtyǵys barysynda qaza tapqan eki polıtseıdiń týystaryna qajetti materıaldyq kómek kórsetýdi tapsyrdy, dep habarlady Almaty qalasy ákiminiń baspasóz qyzmeti.
Sonymen qatar, ákim óziniń orynbasary Vıktor Doljenkovke atys barysynda zardap shekkken páter ıeleriniń páterlerin qysqa merzimde jóndep berýdi mindettedi.
«Qylmyskerlerdi quryqtaý jónindegi operatsııa kásibılikpen júrgizildi, qylmyskerlerdiń kózi joıyldy. Jedel sharaǵa qatysýshylar men beıbit turǵyndar arasynda zardap shekkender joq. Alaıda, qalada 2 saǵatqa sozylǵan atystyń bolýy - nonsens. Bul quqyq qorǵaý organdarynyń qylmystyń aldyn alý sııaqty jumysty jetkiliksiz júrgizetinin kórsetedi»,- dep atap ótti Ahmetjan Esimov.
Esterińizge sala keteıik, 2012 jyldyń 28 shildesinde Almaty qalasynyń Túrksib aýdanynda óz qyzmetterin atqaryp júrgen polıtseılerge shabýyl jasalǵan. Sonyń saldarynan, bir polıtseı sol jerde til tartpaı qaza bolǵan, al ekinshisi aýyr jaralanǵan. Keıin ol aýrýhanada qaıtys boldy. Arnaıy bólimshe qyzemtkerleri «Aqkent» yqsham aýdanynda qylmyskerlerdi anyqtap, barlyq alty qylmyskerdiń kózi joıyldy. Olardyń barlyǵy syrttan kelgen kelimsekter, ShQO-da birge jazalaryn ótegen. Olardyń biri qylmys jasaǵan kezde shartty túrde túrmeden bosaǵan, Almatyda zańsyz júrgen.
Almaty ákimi osy keleńsiz oqıǵalarǵa qatysty quqyq qorǵaý organdary Almatyǵa keletindermen jumysty kúsheıtýi qajettigin atap ótti. Budan ózge, ІІD men PIK birigip páterdi jalǵa berýshiler jónindegi aqparatty bir júıege keltirýi, qylmystyń aldyn alý sharalaryna kópshilikti keńinen tartý tıis dedi.
Jıynda sóz alǵan Almaty qalasy ІІD-niń bastyǵy Erlan Turǵumbaev qylmystyń aldyn alýda kemshilikterdiń bar ekendigin aıtty. Qylmysty toptyń kózi joıylǵannan keıin anyqtalǵanyndaı, «Akkent» yqsham aýdanynda 30 páter jalǵa beriledi eken. Al olarda turyp jatqandar týraly polıtsııada málimet joq.
Ahmetjan Esimov ótken jyly ýchaskelik polıtsııanyń shtatyn 123 adamǵa ulǵaıtý jáne 50 adamnan turatyn tabıǵatty qorǵaıtyn polıtsııa qurý úshin qalalyq bıýdjetten 296 mln. teńge bólingendigin eske salyp ótti. Alaıda, ІІM kúni búginge deıin buǵan buıryq shyǵarmaı otyr.
Ákim Jol polıtsııasy basqarmasyna Almatyǵa kelgen kólikterge baqylaýdy kúsheıtýdi tapsyrdy. Statıstıka boıynsha qalaǵa kún saıyn 200 myńǵa jýyq kólik syrttan keledi eken, olardyń basym kópshiligi Almatyda tirkelmegen.
Ahmetjan Esimov quqyq qorǵaý organdaryna yqpal etetin qoǵamdyq keńes qurýdy da tapsyrdy.
«Qazaqstannyń eń iri jáne eń baı qalasy retinde Almaty ózge óńirlerdegi qylmyskerlerdi ózine tartatyn bolady. Biraq, quqyq qorǵaý organdary almatylyqtardyń qaýipsizdigi úshin óz jumystaryn barynsha jandandyrýlary tıis. Ótken keleńsiz oqıǵalaradan sabaq alyńyzdar»,- dedi ákim.
