Almaty ákimi QR Táýelsizdik kúnine oraı birqatar azamattardy marapattady
ALMATY. QazAqparat - Búgin Almatyda QR Táýelsizdik kúnin merekeleýge arnalǵan saltanatty jıyn ótti. Jıyn barysynda qala ákimi Baýyrjan Baıbek Memleket basshysynyń Jarlyǵyna sáıkes elimizdiń damýyna eleýli úles qosqan almatylyqtarǵa memlekettik marapattar tabystady, dep habarlaıdy QazAqparat tilshisi.
Baýyrjan Baıbek Memleket basshysynyń sarabdal saıasaty men batyl sheshimderiniń arqasynda Qazaqstan damýdyń dańǵyl jolyna túskenin atap ótti.
«Táýelsizdik jyldary Qazaqstan ekonomıkasy 20 esege artty. Jalpy kólemi 10 myń shaqyrymnan astam jol salyndy, jóndeldi, 120 mln. sharshy metr turǵyn úı salynyp, 1 mıllıonnan astam otbasy baspanaly boldy. 15 jylda ortasha jalaqy men zeınetaqy 10 esege artty. Qazirgi kezde bizdiń basty mindetimiz - álemniń damyǵan 30 eliniń qataryna ený. Onyń negizi Memleket basshysy júrgizip otyrǵan saıası, ekonomıkalyq jáne rýhanı jańǵyrý. Jahandaný ǵasyrynda Elbasynyń «Rýhanı jańǵyrý» baǵdarlamasy halqymyzdyń bar bolmysyn, rýhanı qundylyqtar men murasyn saqtap, Táýelsizdigimizdi baıandy etýge yqpal etetin bolady», - dedi B.Baıbek.
Almaty ákimi Elbasynyń bastamasymen júzege asyp jatqan memlekettik baǵdarlamalardyń óńirlik ekonomıka men eńbekpen qamtýǵa zor serpilis bergenin atap ótti. Tek bıyldyń ózinde ǵana Almatyda 20 myń adam jumysqa tartyldy, kósheler men skverlerdi qaıta jasaýǵa 43 myń adam qatysty.
«Nurly jol» baǵdarlamasy elimizdiń óńirlerin kúretamyr joldarmen jalǵap, azamattardyń iskerlik belsendiligin, elimizdiń ınvestıtsııalyq tartymdylyǵyn arttyrdy. Óz kezeginde «Nurly jer» baǵdarlamasy halyqtyń jeńildikpen úı alýyna múmkindik berdi. Qalada 14 myńnan astam páter salynatyn bolsa, sonyń 5880-i bıyl paıdalanýǵa berildi. Bul 2016 jylmen salystyrǵanda 3 esege artyq», - dedi B.Baıbek.
Almaty ákimi halyqaralyq zertteýler qorytyndysy boıynsha 2030 jylǵa qaraı álemdik ekonomıka flagmandary - Ońtústik - Shyǵys Azııa elderi, ásirese Qytaı men Úndistan bolatynyn jetkizdi.
Saltanatty jıyn barysynda elimizdiń damýyna eleýli úles qosqan 70 almatylyq azamatqa memlekettik marapattar tapsyryldy.
«Parasat» ordenimen Qazaqstan Respýblıkasynyń Ánuranyn tuńǵysh oryndaýshy Sara Tynyshtyǵulova marapttaldy. «II dárejeli Dostyq» ordenin memleket jáne qoǵam qaıratkeri, Orta Azııa Ýnıversıtetiniń prezıdenti Jumataı Álıev aldy.
«Qurmet» ordenimen «Men almatylyqpyn» qoǵamdyq qozǵalysynyń negizin qalaýshy Konstantın Avershın, sýretshi Amandos Aqanaev, ánshi Mádına Sádýaqasova, «Ortalyq klınıkalyq aýrýhana» AQ aýrýhanalar birlestiginiń meńgerýshisi Sergeı Shıller marapattaldy.
«ІІІ dárejeli «Eńbek Danqy» ordeni «Aqsaı» Nan bólke kombınaty» JShS nan-bólke ónimderin daıarlaýshy Rýshangúl Gaıtovaǵa, «Kastıng» JShS elektrolız suıyqtyǵy tsehynyń mamany Aleksandr Zeıbelge berildi.
«Qazaqstannyń eńbek sińirgen qaıratkeri» ataǵyn «Symbat» sán akademııasynyń art-dırektory Balnur Asanova ıelendi. Qazaqstan Respýblıkasynyń Qurmet gramotasymen №134 lıtseıdiń hımııa pániniń muǵalimi, 30 jyldyq eńbek ótili bar pedagog Irına Nesterenko marapattaldy.
