Almaty ákimi kópbalaly otbasylardyń bastapqy jarnasyn sýbsıdııalaýdy usyndy

ALMATY. QazAqparat - Almaty ákimi Baýyrjan Baıbek kópbalaly otbasylarǵa baspananyń alǵashqy salymyn sýbsıdııalaý týraly usynys aıtty, dep habarlaıdy QazAqparat tilshisi.

Búgin «Nur Otan» partııasynyń kezekten tys otyrysynda qalalyq fılıal tóraǵasy Baýyrjan Baıbek kópbalaly jáne kómekke muqtaj otbasylardy qorǵaýǵa baǵyttalǵan keshendi joba oılastyrýdy tapsyrǵan bolatyn.

«Aýdan ákimdikteri muqtaj otbasylarmen kezdesip jatyr. Esepti kezdesýlerden maǵan málimetter, usynystar túsip jatyr. Aıtylǵan máselelerdi taldaý kezinde halyq ishinde baspana máselesiniń óte ózekti ekendigi belgili boldy. Turǵyndardyń kópshiliginde jeńildigi bar baǵdarlamalarǵa qatysý úshin bastapqy jarna somasy joq bolyp shyqty. Osyǵan baılanysty 4 jáne odan da kóp balasy bar otbasylarǵa alǵashqy salymdy sýbsıdııalaý múmkindigin qarastyramyz», - dedi ákim.

Munyń aldynda qala basshysy kópbalaly otbasylardy qoldaý aıasynda «Baqytty otbasy» ortalyǵyn qurýdy tapsyrǵan bolatyn.