Almaty ákimi kópbalaly analarmen kezdesti
ALMATY. QazAqparat - Almaty ákimi Baýyrjan Baıbek kópbalaly analardy qabyldady, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasap.
Ákim olardyń barlyq suraqtary men usynystaryn jeke tyńdady.
Suhbattasýǵa kelgen analar kóbinese áleýmettik járdemaqy mólsherin arttyrý, turǵyn úı men turmystyq jaǵdaıdy jaqsartý, eńbekpen qamtý, búldirshinderdi balabaqshaǵa ornalastyrý boıynsha kómek surady.
«Memleket basshysynyń tapsyrmasy boıynsha úkimettik top jumys istep jatyr. Kezdesýlerde aıtylǵan barlyq usynystar saralanady jáne esepke alynady. Bulardan ózge, biz qalalyq deńgeıde kópbalaly analarǵa qoldaý kórsetýdiń naqty tetigi jınaqtalǵan pármendi sharalardy «Nur Otan» partııasynyń kezekten tys konferentsııasynda ashyp aıttyq. Mysaly, kámeletke tolmaǵan 4 jáne odan da kóp balalary bar turmysy tómen otbasylarǵa turǵyn úı alýdyń alǵashqy jarnasynyń tólemin sýbsıdııalaý múmkindigi qarastyrylatyn bolady», - dedi Baýyrjan Baıbek.
Turmysy tómen kópbalaly otbasylarǵa qoldaý kórsetýdiń keshendi sharalary boıynsha múgedek balany úıde oqytýǵa ketetin shyǵynnyń ornyn toltyrý úshin beriletin ataýly kómek pen qıyn jaǵdaı týyndaǵan kezde bir ret kórsetiletin áleýmettik kómek kólemin arttyrý josparlanǵanyn atap ótýge bolady.
Aıta keterligi, Baýyrjan Baıbek buryndary turmysy tómen kópbalaly otbasylardyń ekinshi balasynan bastap balabaqsha shyǵynyna ótemaqy tóleýdi qarastyrýdy tapsyrǵan bolatyn.
