Almaty ákimi qoǵamdyq kólikke qatysty: avtobýsty 33 mınýt kúttim

ALMATY. QazAqparat – Almaty ákimi Erbolat Dosaev bes jyl ishinde BRT jobasyn júzege asyrýmen baılanysty máseleler sheshimin tappaǵanyn aıtty, dep habarlaıdy QazAqparat.

«BRT jobasy aıaqsyz qalǵan»,-dedi qala ákimi Almaly aýdanynyń turǵyndarymen kezdesýi barysynda.

«Men ózim BRT jolymen júrip kórdim. Jobany iske asyrýdyń bes jyly bosqa ketti deýge bolmas, alaıda, máseleler bar. Sebebi, bes jyl boldy, joba aıaqtalmaǵan. Eger BRT iske qosylsa, tıisti ınterval, jyljymaly quram, basqa da dúnıeler bolýy kerek edi. Qazir onyń eshqaısysy joq. Men jol boıynda 32-shi avtobýsty 33 mınýt kúttim. Sebebi, 4 avtobýs jolǵa shyqpaı qalǵan. Bizde qoǵamdyq kóliktiń qory joq eken. Sondyqtan kelesi jyly qosymsha 300 jańa avtobýs pen 100 trolleıbýs satyp alamyz. Osy arqyly qozǵalys ıntervalyn qysqartamyz. Bul qoǵamdyq kólikpen baılanysty máseleniń sheshilýine az da bolsa úles qosady», - dedi qala ákimi.

Erbolat Dosaev BRT-ny salý jumystary sońyna deıin jetkiziletinin aıtty.

«Eger baıqasańyzdar, klassıkalyq BRT Tımırıazev pen Baıtursynov kósheleriniń qıylysynan bastalyp, belgilengen jolaqqa deıin jetedi. Al jolaqtyń oń jaǵynda búginde baǵdarsham saıyn kólikterdiń keptelisi paıda bolyp otyr. Máseleler bar jáne ony bárimiz birlese otyryp sheshetin bolamyz. Shyn máninde, eshkim de bastalǵan jumysty tastaǵaly otyrǵan joq. BRT-ny salyp bitiremiz. Biraq, aldymen onyń tıimdi jolyn anyqtap alýymyz kerek», - dedi Erbolat Dosaev.