Almaty ákimi qoǵamdyq keńes otyrysyn ótkizdi
ALMATY. QazAqparat - Almaty ákimi Baqytjan Saǵyntaev qalalyq qoǵamdyq keńes otyrysyn ótkizdi, dep habarlaıdy QazAqparat tilshisi.
«Almaty qalalyq qoǵamdyq keńesi - respýblıkadaǵy eń belsendi keńes sanalady. Bul keńes qalanyń eń jandy, eń ózekti máseleleriniń sheshimin izdeıtin mańyzdy uıymǵa aınaldy. Qoǵamdyq pikirtalas ekologııa, sáýlet, transport, turǵyn úı-kommýnaldyq sharýashylyq, áleýmettik ınfraqurylym, taǵy basqa máseleler tóńireginde týady. Bul máselelerdiń sheshimi ákimdik jumysynyń nátıjesinde tabylyp keledi», - dedi Baqytjan Saǵyntaev.
Qala ákimi qoǵamdyq keńestiń áleýmettik mańyzyn tilge tıek etti.
«Sizder únemi halyqtyń arasynda júresizder. Qala turǵyndarynyń áleýmettik kóńil-kúıiniń tamyryn dóp basasyzdar. Qalalyqtardyń basty qajettilikterin taba otyryp, ony memlekettik múddemen, bıliktiń sheshý joldarymen ushtastyrýǵa tyrysasyzdar. Men qalalyqtarmen ashyq aralasýǵa daıynmyn. Qalanyń damý josparyn birge talqylaıyq», - dedi ákim.
Aıta ketý kerek, qoǵamdyq keńestiń alǵashqy quramyna 37 múshe kirdi. Onyń 31-i - azamattyq qoǵam ókilderi.
2016-2019 jyldar arasynda bul quram 107 otyrys, 127 komıssııa otyrysyn, 84 qoǵamdyq baqylaý, 16 qoǵamdyq tyńdaý ótkizgen. Qoǵamdyq keńes otyrysynda 475 normatıvtik quqyqtyq akti qaralyp, memlekettik organdarǵa 462 usynys berildi.
