Almaty ákimi kezekti velosherý maýsymyn ashty (FOTO)
ALMATY. QazAqparat - Búgin Almatyda kezekti besinshi velosherý maýsymy ashyldy. Osyǵan oraı, bıylǵy alǵashqy velosherý sharasy tańǵy saǵat 08:30-da ál-Farabı dańǵyly men Táttimbet kóshesiniń qıylysynda bastalyp, Tuńǵysh Prezıdent saıabaǵynyń aldynda aıaqtaldy. Jalpy qashyqtyq - 9 shaqyrymdy qurady. QR Táýelsizdiginiń 25 jyldyǵy men Almaty qalasynyń 1000 jyldyq mereıtoıyna arnalǵan bul sporttyq sharaǵa 3 myńnan astam adam qatysty. Olardyń ishinde Almaty ákimi Baýyrjan Baıbek pen «Almaty arýy-2014» baıqaýynyń jeńimpazy Regına Vandysheva da boldy.
«Biz bul kúndi barlyǵymyz da asyǵa kúttik. Boljam boıynsha búgin jaýyn-shashyn bolýy múmkin edi. Alaıda, bult seıilip, kún jarqyrap shyǵyp, kóńilimizdi shýaqtandyryp jiberdi. Men barlyqtaryńyzdy kezekti velomaýsymnyń ashylýymen quttyqtaımyn!
Bıyl qalamyzda 6 velosherý ótedi. Almatyda buqaralyq sportty damytýǵa barlyq jaǵdaı jasalǵan.
Al velosıped naǵyz demokratııalyq sport túrleriniń biri. Ataqty ǵalym Albert Eınshteınniń: «Velosıped ómir sekildi: tepe-teńdikti saqtaǵyń kelse, únemi qozǵalysta bolýyń kerek», - degen sózi bar. Ol ózi de velosıpeed tepkendi jaqsy kórgen. Álemde mashınalardyń sany 400 mıllıonnan assa, velosıpedterdiń sany olardan úsh ese kóp. Bizdiń qalamyzda da dál osyndaı ara qatynas saqtalady degen úmittemin», - dedi qala basshysy.
Al velosherý aıaqtalǵan soń, qatysýshylar estelik syılyqtarmen marapttaldy. Sonymen qatar, Tuńǵysh Prezıdent saıabaǵynyń aldynda vıktorına baıqaýy jáne kontsert uıymdastyryldy.
